الاثنين، 12 مارس، 2012

مصر على واحدة و نص

عندما تصبح الراقصات هي واجهة بلدك الشريفة العفيفة و المتظاهرات المسحولات بنات من اياهم !!! عندها تصبح خطوات مصر ... على واحدة و نص.


احب احذركم في البداية المقال ده ممكن يكون صدمة فعلا و اظن ده واضح من العنوان و كل اللي هيقروه ممكن ميصدقوش ان انا اللي كتباه بس ساعات الواحد -بيفيض- بيه و بيبقى مش قادر يستحمل و بيحتاج يخرج اللي جواه حتى لو على هيئة -طولة لسان- وهذا المقال بيعبر عني -عندما يصبح لساني طويلا-.


مصر ماشية على واحدة و نص... ودي حقيقة بقت واضحة واللي ينكرها يبقى بيدفن راسه في الرمل و بيضحك على نفسه...و هنبعد ليه؟ تعال نحسبها سوى:
ماهو لما اسماء محفوظ ( رغم اختلافي معها احيانا في الراي و الاسلوب في التعبير عنه) و نوارة نجم يبقوا قلالات الادب و متربوش علشان مهاجمتهم للمجلس العسكري (اللي بيقتل نص المتظاهرين و بيدّعي ان النص التاني خونة علشان يداري على جرايمه) و يتسحبوا على النيابة العسكرية و تطلع ضدهم احكام . و لما فتيات مصريات يتعروا في ميدان التحرير بيد عساكر مصرية و يكون الرد دول بنات مش متربية ايه اللي وداهم هناك و حوار عباية كباسين و يستهلوا اللي يجرالهم؟؟!! و لما واحد في سن جدي يقولي انتي مغرر بيكي و مضحوك عليكي علشان انا مقتنعة ان الثورة مخلصتش ولازم تستمر لحد ما مصر تنضف. و لما يتبصلنا بنظرة مش هي على اساس اننا البنات اياها بتاعة التحرير. و لما المجلس العسكري يؤمر بعمل فحوصات كشف عذرية للمتظاهرات و سميرة ابراهيم تبقى بنت مش تمام علشان قدمت بلاغ ضدهم!!. 


لما كل ست مصرية شريفة تبقى بلطجية او -ست مش كويسة- لما تطلب حقها , و في نفس الوقت مروى تتكرم علشان بترفع من معنويات الداخلية -بترفعها ازاي يعني؟ وانهي داخلية بالظبط؟!!- و الست غادة عبد الرازق تطلع اخوانية و بتديهم صوتها والاخت الفاضلة سمية الخشاب عاوزة تتجوز سلفي ومبتفوتش فرض - اللهم قوي ايمانك يا اختي- و ده سر نجاحها -كرقاصة طبعا- يبقى مصر لازم تكون ماشية على واحدة و نص و ماشية مشي بطال كمان و مبقتش مصر التي في خاطري و انما بقت مصر اللي في شارع الهرم ... و لا دي مصر هبة النيل بس ممكن تكون مصر هبة كازينو الليل!!!!.


ده بيقولك كمان فيفي عبده مرشحة بقوة للام المثالية لسنة2012 و معرفش دي اشاعة ولا حقيقة بس والله ما هستغرب لو -ماما- فيفي بقت ام مثالية علشان علمت مصر كلها ازاي -تهز- وواحدة زي مرات الشهيد عماد عفت اللي بتربي اولاده دلوقتي و حلمها ان ابنها يطلع زي والده عالم وطني ولا ام الشهيد علاء عبد الهادي اللي طلعت من تحت اديها دكتور ومناضل وطني و....شهيد !!! ولا واحدة زي ماما ليلى-كما يسميها شباب الثورة - ام الشهيد خالد سعيد اللي كانت ملهمة لينا كلنا و راجل وسط الناس في التحرير و كانت ام الشباب المصري هناك..ولا واحدة -اسمها امي- محدش يعرفها غيري لوحدها من غير راجل يبقى جنبها طلعت مهندستين و معيدة صيدلانية و كل دول مع كل اللي شافوه -متهزوش- و مع كده برضه ولا واحدة فيهم هتكون ام مثالية!!!!


و لما يكون واجهة سيدات مصر - رقاصات - يبقى اكيد رجالتها طبالين او..... مشيها طبالين برضه. و برضه يبقى طبيعي اسمع اسم واحد زي مصطفى بكري او توفيق عكاشة او مرتضى منصور اكتر ما بسمع اسماء ناس زي الدكتور فاروق الباز والدكتور مجدي يعقوب والدكتور محمد البرادعي و الدكتور احمد زويل . 
و يبقى واحد زي مصطفى بكري الطبال المحترف -الاراري- في الشغلانة مسبش حد الا اما طبله و زمرله ولم النقطة كمان !!! وبقى من الطبيعي انه يقف نافخ نفسه اوي وسط مجلس الشعب -بعد انتخابه كرمز للطبلة- يشتم واحد زي الدكتور البرادعي ويتهمه بالخيانة و العمالة و الاغلبية الاخوانية يسقفوا ورا الطبلة... و راجل زي العليمي يقول مثل بيشير من بعيد ان قيادة هذه البلد تحت يد -حمار- يتحول للجنة القيم وكان ناقص يحبسوه في اوضة الفيران !!. وكل ده و مش عاوزين تعترفوا ان البلد دي ماشية على واحدة و نص؟؟؟


لا يا مصر اننتي كده ماشية في الغلط و محتاجة تفوقي و مش هتفوقي الا -بألم- على وشك يعلمك ان المشي الحرام اخرته وحشة... والرقص مش مهنة محترمة تمتهنيها وسط العالم! لانك كده مبقتيش مصر ام الدنيا! انتي بقيتي النجمة الاستعراضية الاولى للدنيا! . و بقى من حق بكري يطبل و الاخوان يسقفوا و الجنزوري يقول مبنركعش و مروى وآما نعيمة يقولوا بدل النعم نعمين !!! و النيل يمشي من الشرق للغرب بدل ما كان ماشي من الجنوب للشمال  ..علشان يحزّمك ! و انتي يا حلوة ترقصي! و محدش عارف يقول لا! و اللي يقول لا يتحول للجنة قيم او بيلبس عباية بكباسين و خاين و عميل و ابن ستين !!! وانا... وانت ... وركعني يا جدع  .

هناك 4 تعليقات:

  1. انا اسفه اني هقول التعليق ده !!
    كان في صوره و جرافيتي كتر كتير في الشوارع بيقول سؤال واحد !( لماذا لا يموت ولاد الوسخه؟) و كانت الاجابه مؤخرا كالاتي لان الوسخه ولاده , زي ما بيقولوا للاسف مصر ولاده !!
    انا مصريه و هفضل احب بلدي و مش هلم النقطه لغايه ما تنضف

    ردحذف
  2. و انا كمان يا ميحة بحبها وعلشان ككده هفضل انضف فيها على اد ما اقدر و اشاور على كل شئ موسخها لحد ما تنضف و يبطلوا رقص ولم نقطة علشان فرجوا الناس علينا
    ميرسي على تشريفك ليا يا جميلة :)

    ردحذف
  3. أولا ًللأسف ماشوفتهاش إلا دلوقتي، لأول مرة أحسن إني باكتب وأنا باقرا مقالة، كنت حاسس إني ماسك القلم وبأخط الكلمات على السطور، مش بامر بعيني على السطور، مقالة غاية في الروعة، ومعبرة بشدة.
    بجد أهنيكي عليها، ومن أحلى العبارات إللي عجبتني:
    (يبقى مصر لازم تكون ماشية على واحدة و نص و ماشية مشي بطال كمان و مبقتش مصر التي في خاطري و انما بقت مصر اللي في شارع الهرم ... و لا دي مصر هبة النيل بس ممكن تكون مصر هبة كازينو الليل!!!!)
    والفقرة الأخيرة كاملة.
    استمري ربنا يوفقك.

    ردحذف
  4. انك شوفتها ورديت عليا ده شرف ليا في حد ذاته يا فندم ومش عارفة من غير تشجيعك وتسييحك اعمل ايه :)

    ردحذف