السبت، 21 أبريل 2012

مرونة


اللي يفكر شوية يعرف ان الحقايق عمرها ما تكون ثابتة 
الحقايق اللي ثابتة في العالم ده قليلة جدا و تكاد تكون نادرة و غالبا هي حقايق مقدسة
زي وجود الله سبحانه و تعالى حقيقة مقدسة و ثابتة
و ارسال الرسل و الرسالات و الملائكة والجن والشياطين و الموت و الحساب و الجنة و النار كلها  حقايق ثابتة و مقدسة لا مساس بها ولا تشكيك وان كانت وجهات النظر بتختلف في كيفية وجودها و تتغير من ديانة لاخرى لكنها موجودة يعني استحالة تسال واحد مسلم او مسيحي او  حتى يهودي و تقوله ربنا موجود ولا لا و يقولك لا واستحالة حد منهم برضه ينفي انه حيجي يوم و يتحاسب على طاعته لربنا لكن كيفية الحساب دي بقى اللي بيختلفوا فيها بس تظل وجودها حقيقة ثابتة و راسخة
المهم ده مش موضوعنا
موضوعنا بقى ان بخلاف الحقايق المقدسة او الثبتة دي كل شئ في الدنيا قابل للتغيير حتى الحقايق العلمية ممكن نكتشف انها بتتغير مثلا عندك محور الارض كنا حافظين اتجاهه و بنعتبره من المسلمات 
طب ما اهو المحور اتغير بعد اخر زلازل اليابان الرهيبة صحيح ممكن يكون تغيير طفيف بس اتغير يعني هو ميله كان حقيقة و اصبح حقيقة مختلفة تماما
اهو معظم الحقايق اللي بنؤمن بيها كده متغيرة اصعبها في التغيير صحيح الحقايق العلمية و القيم اللي بيؤمن بيها الانسان  و اسهلها في التغيير حقيقة موقف الشخص ناحية حاجة معينة و رايه فيها
بمعنى تاني لما انا اكون مقتنعة ان حد مش كويس واخلاقه سيئة وبعد مده اكتشف اني كنت غلطانة وانه انسان محترم لابد اني اغير موقفي نحيته حتى لو هو كان حقيقته في الاول  فعلا مش كويسة وبعد كده غيرها للاحسن مش معنى ده انه بيتلون او لو انا غيرت تفكيري من ناحيته اني منافقة
لا ده معناه انه اتغير للاحسن وانا كمان حسنت فكرتي عنه
المهم بقى يكون تغيير الحقايق ده جوهري مش ظاهري يعني يكون هو فعلا صلدق في تغييره و ميحنش لايام زمان وانا كمان اكون صادقة في تغيير وجهة نظري عنه و مقعدش كل شوية اذل فيه و افكره انه وحش واني تعطفت و تكرمت عليه و اتعاملت معاه كويس لما اتغير ولا حتى اسرها في نفسي لاني ساعتها حبقى منافقة بجد
برضه لو انت شايف موقف معين سياسي مثلا و اختلفت معاه لفترة و بعد كده اقتنعت انه كويس الاول انت كان عندك اسباب تقنعك ان الموقف ده غلط و بعد كده برضه اكتشفت اسباب جديدة تقنعك ان ده مش غلط عادي انك تغير رايك يمكن الموقف بس صح بس مكنش في الوقت المناسب او انت مكنتش مهيأ نفسيا او فكريا لاستقباله بس بعد الدراسة وتلاشي الاسباب اللي مخوفاك اقتنعت و غيرت فكرك كل ده مفيهوش حاجة المشكلة بقى لو انت بعد اقتناعك بصحة الموقف ده ثبت على رفضه و كابرت تعترف بغلطك او تغيير موقفك على الاقل هنا بقى احنا دخلنا مرحلة الجمود الفكري اللي لو دخلت دوامتها حتوه منك المعاني و مش تعرف الصح من الغلط و لا الحقيقة من الوهم
مينفعش تكابر و مينفعش تحول رايك لمسلمات جامدة لا يمكن تغييرها 
الدنيا اتخلقت مرنة ميزتها التغيير لو انت بصيت على الارض من 50 الف سنة مثلا مش كنت حتعرفها اتغيرت كتير مبقاش فيها حاجة في مكانها ده بيقولك في قارات بحالها اختفت و ارض مكنتش موجدة اتوجدت يبقى ازاي انت بقى عاوز دماغك تفضل ثابتة متتغيرش؟ اكيد الكلام ده مينفعش خالص لازم يكون عندك مرونة شبه مرونة الدنيا علشان تعرف تعييش فيها والا حتلاقيها في يوم وسعت عليك اوي ويوم تاني بقيت ضيقة اوي و ساعتها متسالنيش انت مخنوق ليه

الثلاثاء، 17 أبريل 2012

كلام لابد منه -3 (انه الفخ)



الكلام ده للاخوة اللي بتقول نزاهة القضاء و اللجنة القضائية العليا لانتخابات الرئاسة
نزاهة القضاء يعني انك موافق على احكام البراءة لقتلة الثوار
نزاهة القضاء يعني انك موافق ان خالد سعيد ديلر مخدرات و ان اللي قتلوه يستحقوا فعلا الحكم المخفف
نزاهة القضاء يعني انك موافق على هروب الامريكان المتهمين في قضية منظمات حقوق الانسان
يعني انك موافق على الانتخابات اللي كانت بتتزور ايام العصر البائد
يعني انك موافق ان الثورة ملهاش لازمة
وانك برضه حتوافق لما مبارك يطلع براءة
اه حيطلع براءة مستغرب ليه؟
مش الظباط مقتلوش الثوار وكلهم طلعوا براءة والثوار طلعوا بلطجية؟
يبقى اكيد مبارك معملش حاجة غلط ولا اشترك في قتل الثوار ولو اثبتم انه له دخل مش حياخد حكم بالعكس حياخد نيشان 
مش قضى على البلطجية؟
ماهو ده هو القضاء النزيه اللي انتم بتتكلموا عنه
اخواني الثوار اللي نزلوا سلخ في الجماعات والحركات الاسلامية علشان قتلوا نفسهم علشان نتيجة الاستفتاء تبقى نعم و دلوقتي يتجرعوا ويلات ما اقترفت يداهم
احب انبهكم قبل ما تقعوا في نفس الفخ و تقبلوا احكام قضاة انتم ادرى الناس بفاسدهم و تستندوا على كلام هؤلاء القضاء لا يدفعكم لذلك الا كراهية و معاداة بعض الاشخاص الذين اشارككم في رفضهم و رفض ان يتقلدوا مناصب هم اقل من تحمل مسؤولية و خطورة هذه المناصب 
لو قبلتم كلام هؤلاء القضاة دلوقتي متزعلوش بعدين لو طلعوكم بلطجية لان الكرة ستعود عليكم و سيشمت بكم غدا ما شمتم بهم انتم اليوم و لن تجدوا قيمة للدلائل اللي حتقدموها لتثبتوا فساد القضاة (اللي انتم وثقتم في حكمهم في ما ينفعكم ولا يضركم و سترفضوا احكامها غدا عندما تهدد اهدافكم)
احذروا ايها الثوار من الظلم حتى لا يرد لكم الصاع صاعين
احذروا
انه الفخ

الاثنين، 16 أبريل 2012

لعبة الاقتحام



اصبحت لا اعلم من منا يقتحم الاخر
كنت اظن اني اقتحم مسافة الفراغ التي يبقيها بيننا
و لكني تاكدت انه يحاول اقتحام حياتي يراقب كل ما اقول و افعل 
يحفظه و يعيد جزء منه على مسامعي
لم اكن اريد سوى ان اكون موجودة
فقط اريد ان ابقى هناك لا اعلم حتى الان لماذا 
كل ما اعلمه ان هذا هو ما اريده
قد يكون احساس بامان ضائع
قد يكون ما افتقده في الجميع
قد يكون الشئ الغامض الذي يدفعني لاكون شخص افضل
لا اعلم و لكني اريده ان يبقى قريبا
و لكني فوجئت به يبحث عن ما هو اكثر من مجرد وجود
انه يقتحم احلامي
يراقبها ثم يمليها علي
يقتحم افكاري 
يقراءها ثم يسردها بصوت خفيض
يقتحم كلماتي 
يحفظها ثم يستخدمها في الرد على كلامي
اصبحت اتحدث معه كمن يمشي على سلك رفيع معلق في اعلى سماء فوق هوة عميقة و مخيفة
يصيبني بالخوف حين اءنس وجوده
و يصيبني بالرغبة في البقاء حين يختفي
لم اكن ممن يعرفون الترقب والانتظار 
لكني انتظر و اترقب حضوره
و هو ما ارعبني اليوم عندما كنت افكر هل اقتحامي للفراغ بيننا سوف يتسبب له بضيق فكانت الاجابة بل الا يسبب لك الجنون اقتحامه لكل جسورك و سدودك دون ان يمر على حتى هذا الفراغ 
انت تريدي فقط البقاء و هو يهوى الامتلاك
ولكن يبقى انكم تشتركون بنفس اللعبة 
لعبة الاقتحام

الأحد، 15 أبريل 2012

كلام لابد منه -2 (يا رب نفهم)


ناس كتير مستغربة و بتسالني
اسم ابو الفتوح منور جنب صورتك تضامنا و دعم ليه اومال بتدافعي عن ابو اسماعيل ليه؟ المفروض تبقى فرحانة انه انزاح من سكتكم
اقوله انا بقى ولما ابقى حاسة انه مظلوم ومعاه حق واكتم الحق و مدافعش عنه اجي يوم القيامة و اقول لربنا ايه؟
اصلي كنت مش بحبه 
ولا اقوله اصل ابو الفتوح كان اصلح منه فقولت مصلحة؟
و بعدين الغبي بس هو اللي يفرح بتلاعب يبعد انسان شريف لان الدور حيبقى عليه؟
سهل جدا يتلفق لابو الفتوح مصيبة تزيحه هو كمان من سكتهم وكمان سهل انه يتقتل مانا لو سكت على اللي بيحصل دلوقتي حيسكتوا هم كمان لو المصيبة بقت عندي و نسكت كلنا لحد ما نضيع
الموضوع مبقاش مرشح بدعمه الموضوع بقى كلمة حق يا تقولها يا تفضل طول عمرك مكلل بعار السكوت عنها
و حتى الشاطر و ايمن نور انا رافضة التلاعب اللي بيحصل معاهم
انا عاوزاهم كلهم ينزلوا واختار الاصلح مش مهم يكسب ولا لا بس احنا كده مبقيناش احرار احنا كل يوم دراعنا بيتلوي اكتر من اليوم اللي قبله
كلنا
واحد واحد
و الحل اننا منسكتش
يا رب نفهم

الجمعة، 13 أبريل 2012

كلام لابد منه


كده المشهد بقى في قمة الهزلية بجد
الاخوان غيروا رايهم في اقل من 24 ساعة و بقى اللي كانوا بيقولوا يسقط حكم العسكر كان معاهم حق و هم حلوين و كويسين و اعترفوا انهم كانوا غلطانين في الشباب الثوري الامور
التلفزيون المصري بيشيد بحركة 6 ابريل(حاسس بمصيبة جيالهم) و بيتغنى بوطنيتهم  وانهم اثروا مصالح مصر على مصالحهم الشخصية
الناس بقت منتظرة اي اشاعة عن ابو اسماعيل علشان يمسكوا في رقبته و يقولوا عليه كداب وهم بغبائهم ده بيساعدوه على الانتشار و الوصول للناس كانهم مش اتعلموا ان كل اشاعة بيطلعوها و يستلذوا بجلده و التشهير بيه بترجعه تاني اقوى من الاول لكن الكراهية عمتهم لدرجة مستنينله جنازة و يشبعوا فيها لطم وفي الاخر يقعدوا يلطموا على خيبيتهم 
ايه الجنان ده كل التصرفات دي مش طبيعية و قمة الهزلية اننا نصدقها و نبني عليها مواقفنا
ده مبقاش في حد واحد في البلد دي صاحب كلمة او موقف لوجه الله والوطن
الكل بقى ما يصدق اخر قطر فيه مصلحته و ينط 
كله بقى بيكدب على كله
كله بيمثل
حتى الناس اللي بحترمهم و بحبهم وواثقة فيهم سكوتهم بقى مميت
ممكن تتكلموا و حد يفهمني ايه كمية الجنون ده؟؟؟؟؟؟؟؟؟؟؟؟

الثلاثاء، 10 أبريل 2012

فوق صفحة الماء السوداء


لا يُرى سوى الظلام ... بالرغم من ان الاف الاصوات ... يُغلف الجو الصمت الشديد ... بالرغم من اضواء الفنادق الفاخرة المتناثرة على الضفاف ... تظل  صفحة الماء سوداء ... و كانها ضجت باحبار كتبت فوقها كل الكلمات والاقاصيص ... فهذان عاشقان نفدت احبارهم و هم  يسطرون قصتهم الحزينة ... التي حاربا من اجلها جنود معارك ما وراء كل الشموس ... و لكن تبقى النهاية و يبقى الفراق هو القدر المحتوم .
و هذه قصة الفتاة الوحيدة ...التي تتلفت في كل ثنايا الحياة باحثة عن حلمها الضائع بين غيابات المياه السوداء.
و ذاك الاب المسكين الذي كاد ان يطعنه الكبر و الالم ...  بعد طعنة نضوب الوفاء والرحمة في قلوب الابناء

و هذه الكلمات الحزينة الساقطة من قصة العامل البسيط ... الذي تغرب عن بلاده و اهله لاهثا وراء الاحلام تفرقت و تناثرت فوق صفحات الحياة الاشد قسوة و سواداً من صفحة هذا النهر الاسود ... حتى تحولت كل الاحلام و الايام الي سراب
قصص و حكايات ترويها صفحة مياه بحر الماضي و الالام ...
و ها انا لازلت اقف وحدي .... اتامل و اقراء كل الحكايات .

الأحد، 8 أبريل 2012

الله جميل يحب الجمال






دائما نختار النية الاسوء لانها الاسهل
البنت اللي تكلم ولد تبقى مايصة وبجحة
الولد اللي بيكلم بنت يبقى بيعاكسها او بيرسم عليها
البنت اللي تسمع مزيكا باستمتاع تبقى اصلها رقاصة
ولو دندنت معاها ممكن كمان تبقى كافرة
الولد اللي يرسم بنت يبقى فاسق
الفن حرام والحب حرام والحرية حرام واللي يدور عليهم يبقى ملعون
لو كل حاجة كويسة حرام في المطلق يبقى ربنا خلق الدنيا علشان نشوف المر بس و منعرفش حاجة حلوة فيها
ولازم علشان نبقى مؤدبين ومحترمين نلغي اي حاسة لتذوق اي جمال 
طب ليه ربنا اسمه البديع؟
لانه ابدع الخلق فيما لا مثيل له
طب ليه خلق الجمال؟
 علشان يعذبنا بوجوده و منبصلوش و نقول الله؟
طب ليه الهم المبدعين يصورولنا الجمال في شتى الالوان والاشكال؟
علشان برضه نودي وشنا الناحية التانية بدل منقول سبحان اللي اداله القدرة على الابداع و ابدع فوق ابداع هذا الفنان؟
مقولتش اننا لما نشوف الاخت الممثلة الفاضلة طالعا كما ولدتها امها على الشاشات نقول الله سبحان الذي ابدع
بس برضه مينفعش لما نشوف فنان رسم وجه فاحسن رسمه بدقة و جمال نقول استغفر الله العظيم
في خط فاصل بين الفن و الاباحية
وخط فاصل برضه بين الادب والتخلف
حاولوا مش تعدوا الخط ده
وتذكروا ديما ان مش معنى التدين او التادب انك تشوف الكون قبيح
لا المعنى الاعمق انك تدور على كل جميل و تقول سبحان الله
فالله جميل يحب الجمال
و حاولوا تحسنوا النية شوية مش كل اللي حوليكم نيتهم سودة ولا كلهم سفلة
وانتم كمان مش ملايكة



الثلاثاء، 3 أبريل 2012

فارس بلا معركة و معركة بلا فرسان




المعركة يخوضوها الصعاليك الجبناء
يلتفون حول الغنيمة يتقاتلون بضراوة
 هو قتال حتى الموت 
ومن سيبقى ليهنأ بالغنيمة ما هو الا صعلوك
مهما كسب سيظل هو الصعلوك القاتل الرعديد
و ها هي الفرسان تأبى ان تلقي بنفسها بين الصعاليك 
تأبى ان تكون بخضم تلك المعركة القذرة
فشرف الفرسان اغلى من اي غنيمة
ولكن النتيجة سيصبح الفارس خاسر بلا معركة يخوضها و لكن بشرف
و سيصبح الصعلوك فائز بوضاعة يرتكبها وبلا شرف
و لكن اي شرف فرسان تتحدث عنه 
و اي فارس هو انت بلا معارك يا جبان
واي معركة شريفة هذه لا يخوضوها الا الجرذان الشجعان 
لا يدفعهم سوى الجشع و الطمع و لمعان الذهب و المرجان
تاهت المعاني و اختلطت الالوان 
لم تعد تعلم الجانب الحق لتقاتل معه
الشريف اصبح جبانا
و القاتل اصبح سيد الشجعان
صارت الحياة فارس بلا معركة
و معركة بلا فرسان