السبت، 16 يونيو، 2012

الآن عرفتكم






سيبكم من اني مقتنعة اننا لحد دلوقتي لا بقى عندنا عيش ولا حرية ولا عدالة اجتماعية ولا كرامة ولا انسانية
ولا حيبقى عندنا رئيس وبكرة حقولكم ليه بالظبط
بس عارفين انا كسبت ايه بالظبط من الثورة دي؟
عملت اعادة تصنيف للناس اللي في حياتي وعرفت الجدع من الجبان و الساذج من الغبي من الذكي و الحيوان من الانسان 
عرفت مين اللي اقدر اديله دهري وانا مطمنة و اعرف انه او انها حيفدوني بروحهم
عرفت كمان اللي اتخدعت فيهم سنين وهم جواهم فاضي تافه و ساذج و الواحد ميعتمدش عليهم يجيبوله حتى كوباية ماية
عرفت اللي وثقت فيهم وطلعوا خاينين مش بس ليا لا لبلدهم حيبعوها عند اول محطة علشان مصالحهم
عرفت اللي كنت ببصلهم فوق كأنهم حاجة كبيرة اوي و بقيت دلوقتي مش شيفاهم اكتر من صراصير اخرهم افعصهم بجزمتي اللي حتكون اكيد انضف منهم ومن قذارتهم
عرفت اللي كانوا مستخبيين ورا ستاير الظلم و عمرهم ما يأسوا من قولة كلمة الحق ولا محاربة الشياطين اللي حبساهم
عرفت اصناف و اشكال والوان من البشر
عرفت ازاي اختار انسان اخليه مثل اعلى ليا
عرفت انه مش لازم يكون مشهور ومحبوب اد ما المفروض يكون صادق و نضيف
عرفت ان الدنيا لسة فيها طهر و نضافة بس برضه لسة فيها خسة و ندالة ممكن تلاقيهم في اقرب الناس ليك
اتعلمت مخفش من حد
اتعلمت اخسر الجبان من غير ما ازعل عليه
اتعلمت اطرد من حياتي كل شئ قذر غير آسفة على ابتعاده مهما كان غالي
اكيد مش حيبقى اغلى من ناس ودعتهم غصب عني و عنهم لانهم كانوا انضف من انهم يكملوا في وسط الحياة وهي مليانة بناس قذرة كده
اكيد مش حزعل على اللي بطرده من حياتي و عقله وايده ملوثين بدم اطهر ناس عاشوا على الارض دي اد ما زعلت على فراق اصحاب الدم
اتعلمت كمان ان ابتسامة الشهيد متوجعنيش اد ما تقويني 
اتعلمت ان روحه مسبتنيش ولسة مكملة معايا المشوار
عرفت ناس كتير على حقيقتها وهم كمان عرّفوني على الحياة صح 
و بقولها في وش الكل من غير ما اخاف
انتم واضحين اوي
اكتر مما تتخيلوا النضيف فيكم شيفاه كبير اوي في عيني و القذر برضه شيفاه اقل من الحشرة اللي حيبقى من حقها تزعل مني لو شبهتها بيه
الثورة مش فادتني بالدم الرصاص و الارض و الاهداف
الثورة بس خالتني اشوف حقايق كنت حعيش عمري معرفهاش
و دلوقتي عرفتها  .... وعرفتكم

ليست هناك تعليقات:

إرسال تعليق