الاثنين، 2 يوليو، 2012

حدوتة


كان ياما كان ... يا سادة يا كرام ... و ما يحلى الكلام ... الا بذكر النبي عليه الصلاة السلام
متردوا و تقولوا عليه افضل صلاة وسلام ....
كان في حاضر الوقت والزمان ... في بنوتة... حلوة صغنتوتة ... بصيت للسما الزرقا... لقيتها بعيدة ... مسافرة و مفارقة ... بس كانت جميلة و متزينة .... بسحاب بقلب ابيض زينا ... حبت البنت السما ... واتمنت توصلها ... بس كانت قصيرة .... استنت تطول حبة ... و فضلت البنت تطول ... و هي باصة للسما الزرقا ... و عدت الايام ... و كبرت الاحلام ... وهي بتبص للسما شافت .... بين السحاب كلام ...مكتوب بالنور .... حولين قمر بنور ... بس تعرف منين تقرا الكلام ... و هي يادوب بتتهجى الحروف ... حلمت البنت تطول ...توصل للسما ... و تتعلم تقرا كلام السحاب ...فضلت بصالها و تحلم .. تكبر تتعلم ... من كتر ما بصت للسما ... كانت تقع .... تنجرح ... تتالم ... بس كل الالم مخلهاش تبطل ... تحلم ... ولا تحب السما 

اتعلمت لغة السحاب ... قريت كلامه ... سمعت همس السما ... غنت معاها ... اناشيد الملايكة ... كل الناس استغربت من البنت ... افتكروها مجنونة ... بتقرا حروف من نور .. و تغني مع الملايكة مش بتتشاف ... بس هي كانت عارفة انه مش جنون ... اصرت على حلمها ... وكبر حبها ... للكلام ... قالوا عنها عنيدة ... وهي عشقت عندها ... او عشق السما والسحاب
شافت اكتر ... لقيت حروف اكتر ... و كلام ... منقوش على وش البحر ... حبت حروف البحر الغرقانة ... و حروف النور الطايرة بين السحاب ... و ذي ما غنت مع الملايكة غنت مع عرايس البحر ... للماية والكلام ... بقوا يحكولها الحواديت ... وهي تسمع وتقرا ... و كمان تكتبها... ايوة... قررت تكتب كل الحواديت ... و كل الاغاني ... اللي بيغنيهالها الحور ... علشان بليل لما تبقى لوحدها  و يروح النور ... الحكايات تنورلها دنيتها و تقعد تقراها تسليها في وحدتها ... كبرت البنت اكتر ... و الحلم لسة بيكبر ... و بقى كل نفسها كل الناس تقرى زيها كلام السما والبحور .. وتسمع الاغاني والحواديت ... من السما و النور ... و عرفت ان كل انسان اتخلق لسبب ... وهي اتخلقت علشان تحلم ... وتحكي الحواديت

هناك 35 تعليقًا:

  1. كنت متاكد ان المرة دي هاقرا حاجة مختلفة تماما - مجموعة من الابطال جوه بوست واحد البنوتة والسما والسحاب والاحلام والاحاسيس والحب وحروف والكتابة والقراية وملايكة وعرايس البحر وكاني وانا بقرا شايف الابطال دول كل واحد فيهم بيقوم بدوره ببراعة
    فكرة اكثر من رائعة - واحساسي ان البنوتة دي هي انتي
    صح؟

    ردحذف
    الردود
    1. اولا سعيدة انها عجبتك :)
      ثانيا ايه رايك انت مجنونة انا كفاية اني اكون البنوتة دي ؟ :)

      حذف
  2. جميله اوي والله يامنه صحيح كلمات بسيطه بس تتحس وتدخل القلب تسلم ايدك

    ردحذف
    الردود
    1. ميرسي يا شريف :)
      سعيدة بمتابعتك ليا ديما وانها عجبتك :)

      حذف
  3. الغريب ان الحلم بداخلها قاوم قيود الحياة و ظل منطلقا للسماء لذا هي خلقت للحلم
    جميلة اوي
    تحياتي

    ردحذف
    الردود
    1. اشكرك يا مصطفى سعيدة انها عجبتك :)

      حذف
  4. بس ده مش جنون في رأي - ده انطلاق وخيال واختلاف مع ان الجنون احيانا بيكون مطلوب في بعض الحالات

    ردحذف
    الردود
    1. انت شوفتها حد منطلق
      في ناس كتير شافتها مجنونة
      كل واحد و ذوقه بقى
      عموما اهم حاجة اننا نحلم زيها علشان لو عشنا في الواقع بتاعنا ده من غير حلم يبقى نموت احسن
      و بعدين نظرا لن انا بحب السما و البحر ممكن نعتبرها انا مفيش مشاكل :)

      حذف
  5. ولولا اختلاف الاذواق لبارت السلع
    المهم ان الفكرة عجبتني جدا
    تسلم ايدك

    ردحذف
  6. جميله جدا وجميل انها فى كل مره بتحقق احلامها
    تحياتى

    ردحذف
    الردود
    1. مفيش حد بيحقق حلمه بسهولة بس المهم انها مش بتزهق
      ميرسي على ردك الجميل :)

      حذف
  7. جمييييييييييييييييييييييلة اووووووووووووووووى يا منة
    حلوة وشقية كلها أحاسيس حلوة وبريئة
    :)))

    ردحذف
    الردود
    1. ميرسي يا جميل انتي ديما بتفرحيني بزيارتك و ردودك الجميلة :)

      حذف
  8. جميله اوووووى اووووى يا منه
    دايما الاحلام هى اللى بتخلينا بنشوف كل حاجه جميله ومع وصولنا لحلم بنبدأ نحلم فى اللى بعده

    تسلم ايدك يا جميله :))

    ردحذف
    الردود
    1. ميرسي يا جميل
      تسلمي على المرور والرد الجميل :)

      حذف
  9. المتعة في غربة الاحلام مع تمني مشاركة الاخريين لها في هذه اللغة
    عندما يعتقد الانسان أنه مجنون لأنه متفرد بلغة وعالم خاص به

    (بقى كل نفسها كل الناس تقرى زيها كلام السما والبحور)

    ردحذف
    الردود
    1. بس محدش عاوز يقرا احلام دلوقتي
      علشان كده بتحلم لوحدها
      مجنونة بقى

      حذف
    2. سلامتها من الجنان

      حذف
  10. سطور رائعة
    اااستمتعت بها
    الحلم حياة

    تسلم ايدك
    مع خالص تحياتى

    ردحذف
    الردود
    1. ميرسي يا فندم
      تسلم على المرور والرد الجميل :)

      حذف
  11. جميييييييييييييييييله للابد
    تسلمي عليها يا جميل

    ردحذف
    الردود
    1. تسلميلي :)))
      انتي الاجمل والله :)

      حذف
  12. ما اجمل البراءة
    تحياتى لابداعك منه

    ردحذف
    الردود
    1. اشكرك محمد على المتابعة والاهتمام والتشجيع :)

      حذف
  13. ايه التدوينة الجميييييلة دي والبنوتة الأجمل

    أسلوب رائع وبكلمات بسيطة لكن تتحس أوي

    حلو الخيال والانطلاق والمغامرة والحرية وحتى الجنون

    ردحذف
    الردود
    1. ميرسي يا ضياء
      مبسوطة كتير انها عجبتك :)

      حذف
  14. مساء الغاردينيا
    :)
    جميلة جداً لأنها بريئة وحالمة
    فهل للحياة معنى دون حلم !"
    ؛؛
    ؛
    لروحك عبق الغاردينيا
    كانت هنا
    Reemaas

    ردحذف
    الردود
    1. ربنا يخليكي يا جميل :)
      و معاكي حق مينفعش نعيش من غير حلم مش حنستحمل الدنيا اصلا

      حذف
  15. جميلة جدًا !
    بالتوفيقِ لكِ !

    ردحذف
  16. جميلة ورقيقة ..


    سلمت يداكِ

    ردحذف
  17. عسوله كده
    الجنون تميز على فكره
    ومش أي حد يقدر يكون مجنون :)

    ردحذف
    الردود
    1. انا بقول كده برضه
      علشان كده انا مجنونة وافتخر :)
      ميرسي على وجودك يا شذى ببقى مبسوطة جدا من وجودك وتعليقاتك :)

      حذف