الثلاثاء، 3 يوليو، 2012

ادينا بندردش ...ورانا ايه؟



منة بنت سيد طفلة مجنونة دماغها ماليها افكار شبهها وجاية تتعبكم بجنونها ده لو فاكر انك ممكن تلاقي هنا حاجة تانية غير الافكار فامشي فورا هنا مفيش الا شوية افكار مجنونة اتحمل مسئوليتها وحدي و مش حقول حقوق ملكية او فكرية او فوزية فهذه افكار من الجميع و للجميع

هكذا عرفت نفسي على مدونتي الصغيرة ... وهكذا ارى نفسي ... منذ زمن ... تلك الطفلة الصغيرة المجنونة التي لا تكبر ابدا ... اسمي منة الله ...عمري 27 سنة ...مهندسة ...بحب حاجات كتير اوي اهمها الكتابة والقراية ... في علاقة غريبة ديماً بتربطني بالورق و الكلام ... مش عارفة ليه بس بحبهم اوي ... كمان بحب الرسم والتصوير ... بس فاشلة فيهم جدا (قال يعني فالحة في الكتابة :) )
انا بنت عادية جدا ... و اقل من عادية كمان ... بس بحب نفسي زي ما انا كده و بحب ابقى على طبيعتي و ده طبعا مش بيعجب حد ...
بدات التدوين امتى؟؟ لو المقصود عمل مدونتي اللي بكتب فيها دلوقتي يبقى من شهر 2 اللي فات ... وكان ليا قبلها تجربة عمل مدونة بس فشلت لاني مش كنت مهتمة بنشر اللي بكتبه بالرغم من اني بكتب من زمان من حوالي 15 سنة بس كنت بحتفظ بكلامي لنفسي و مش بخلي حد يقراه لحد ما كبرت في دماغي انشر اللي بكتبه لاصحابي فبقيت اعمل -نوت- على -الفيس بوك- و بعد كده عملت مدونة زي ما قولتلكم فشلت بسبب الاهمال وعدم الخبرة ... و اخيرا عملت مدونتي اللي بكتبلكم منها دلوقتي ... فراولة ...
انا الفراولة ... والفراولة انا ... بحبها جدا و كتبت اول تدوينة ليا عليها عن حبي ليها وعلشان كده اخترتها علشان تبقى اسم مدونتي ... علشان شبهي 
بحاول اخلي فراولة تعبر عني في كل شئ فيها ... الكلام... الصور ... الفيديوهات ... المزيكا ...كل حتة فيها بتتكلم عن حاجة جوايا ... 
في صديقة ليا اسمها جيهان محمد صاحبة مدونة بنت المحروسة (المنهوبة سابقاً) الصراحة هي اول حد عرفني سكة التدوين بالصدفة من غير ما تقصد و ده كان من حوالي سنتين ...لما انشات المدونة بتاعتها عجبتني الفكرة اوي و بدات ادرس فكرة ان يبقى عندي مدونة لحد ما قررت وبدات فعلا اشتغل في مدونتي الاولى ... كمان صديقتي سميحة الصواف  صاحبة مدونة (احمر فاقع ) اللي خالتني احب اقرا الاعمال و القصص من المدونات و اعلق هناك بدل ما كنت بعلق على الفيس ... عملت كده حالة حب بيني و بين المدونات  ... و مش حنسى الدكتورة شيرين اللي عملت ايفنت التدوين اليومي لشهر يونيو اللي خالاني اتعرف بناس جميلة زيكم ... بقيت اقرالهم اوي و بقيت استنى ردودهم وتعليقاتهم ونقدهم لكل حاجة بكتبها .. ناس كتير عرفتها و اسعدتني واخص بالذكر شريف الصافتي اول مدون اتعرفت عليه في الحملة و استاذ امجد (سندباد) و شذى و اميرة اللي بلاقي نفسي في تدويناتهم الجميلة و كمان استاذ محمد البرقي ...و ناس كتير اوي (و النبي ما تزعلوا مني اني مش قولت اسمائكم كلكم انا لو عليا عاوزة اقول اسماء كل الناس واحد واحد بس هم قالوا 3 وانا قولت 8 يعني ممكن يضربوني كده :))
برة التدوين كتير اثروا فيا و بحسهم بيكتبوا معايا من كتر ما كلامهم عايش جوة دماغي زي استاذنا العظيم نجيب محفوظ و عمنا صلاح جاهين (حبيبي) و الاستاذ انيس منصور وغيرهم ناس كتير و من الكتاب الصغيرين في الاخين الحلوين عمر طاهر و بلال فضل اللي ساعات بحس انهم بيقعدوا يتناقشوا جوة دماغي من كتر مانا  دماغي مليانة بكلامهم :)
رغاية انا اوي مش كده؟ ... بس انا كده لما يبقالي نفس اكتب ... بكتب ... في اي وقت ... اي مكان ... و احب اقول كل اللي في قلبي... بحس اني مرتاحة كده اوي ...مليش اسلوب محدد ... بكتب شعر و نثر وقصص و خواطر و مقالات .... في كل حاجة .. حب ... كره... سياسة .... حزن ... فرح ...بالعامية والفصحة والانجليزي كمان (بس مش بنشره علشان محدش يتريق بس ) المهم اني اكتب كل اللي في قلبي 
انا مش بيميز كتاباتي شئ الا انها تشبهني علشان كده بحبها ... حتى لو حد شافها وحشة ...عادي كل واحد في الحلو وفيه الوحش واهو الوحش اللي هم شايفينه ده هو الوحش اللي فيا من وجهة نظرهم
و علشان كده كل التدوينات بحبها و مفيش ولا واحدة تعتبر مميزة بالنسبالي بس لو عاوزيني ارشحلكم حاجة تقروها ممكن تشوفوا اخر الرسائل يا رب تعجبكم
من اغرب واحلى المواقف اللي حصلتلي
اول يوم في حملة التدوين لما نزلت تدوينة باسم تلك المراة في اليوم ده الاستاذ امجد (سندباد) نزل تدوينة باسم في وجع الوطن و كانت معانيها قريبة اوي من التدوينة بتاعتي اللي هو مكنش قراها اصلا ... كان توارد خواطر كما يسميه و انا سعدت جدا بالصدفة دي اللي كانت بداية صداقتنا اللي بتشرف بيها جدا 

هناك 26 تعليقًا:

  1. مساءك بنفسج
    وكمان فراولة " بحبها جدا بس للأسف عندي حساسية منها بس برضه بعاند واكلها "
    ونحن والقمر جيران يا سلام يا سيدة فروز
    عجبني كلامك اووي
    وان شاء الله اعرفك اكتر

    ردحذف
    الردود
    1. مساء البنفسج اللي بحبه اوي برضه والفراولة اللي بتجيبلي انا كمان حساسية ومجننة ماما من وانا صغننة بسببها :)
      انا سعيدة بوجودك خالص و يشرفني اني اعرفك اكتر يا جميل
      انتي نورتيني بجد :)

      حذف
  2. انا هابدأ من اخر التدوينة وانا كمان سعيد بالصداقة دي ويشسرفني اني اكون احد قراءك ومن معجبي كتاباتك
    بيعجبني اسلوبك جدا فيه بساطة وتلقائية - انتي فعلا كده هي دي انتي - اللي في الحقيقة هي اللي في المدونة وده اللي بيعجبني في اسلوبك التلقائية اللي فيها ابداع
    احييكي علي البوست ومتشكر انك سمحتي لينا نتعرف عليكي اكتر
    تحياتي الخالصة يامنة ربنا يخليكي

    ردحذف
    الردود
    1. مبسوطة انها عجبتك يا رب ديما و انا ديما يشرفني معرفتك و بشكر كل يوم التدوينتين اللي عرفوني بيك بجد :)
      وانا عارفة ان انا في التدوين هي انا في الحقيقة ودي المشكلة
      ان انا هو انا طول الوقت وده بيزعل ناس كتير مني
      يا رب بس مش ازعلكم في يوم ما
      بتشرفني بوجودك و ردودك الجميلة كالعادة :)

      حذف
  3. جميل يا منه أنا مبسوطه إني عرفتك مدونتك مختلفه و إنتِ بسيطه و كتاباتك بتدخل القلب :)

    إستمري و إنجحي

    تحياتي لكِ

    ردحذف
    الردود
    1. انا الاسعد اني عرفتك بجد و الايفنت كان من احلى الحاجات اللي حصلتلي في حياتي
      بعيدا عن الكتابة و القراية
      انا مبسوطة بجد اني عرفتكم كلكم يا رب ديما معرفة خير :)

      حذف
  4. جميل جدا اسلوبك فى الاجابة عن الاسئلة
    استمتعت جدا وانا بقرالك
    بالتوفيق يا جميلة

    ردحذف
    الردود
    1. الحمد لله ان كان في اسئلة ساعدتني كتير لاني من غيرها عمري ما كنت حعرف اكتب كلمتين عن نفسي
      انا مبسوطة انها عجبتك ويا رب منوراني ديما :)

      حذف
  5. بسيطه ورقيقه
    وبحس ان فيكي حاجه مني
    أو العكس :)

    عموما احنا قد بعضينا ^_*

    انا مبسوطه جدا بيكي بجد
    ربنا يوفقك ويفرحك دايما :)

    ردحذف
    الردود
    1. انتي اللي رقيقة جدا بجد وانا فعلا ديما بحس ان احنا فعلا فينا شبه من بعض بس انتي على احلى طبعا ^_^
      و انا مبسوطة بجد بمعرفتك اوي
      يا رب ديما معرفة في الخير :)

      حذف
  6. جميله اوي يامنه كلامك دائما كده قريب من القلب عشان طالع من القلب

    ردحذف
    الردود
    1. ربنا يخليك يا شريف اشكرك ديما :)

      حذف
  7. سطور جميلة

    وتعريف بسيط

    تسلم ايدك

    وربنا يوفقك

    مع خالص تحياتى

    ردحذف
    الردود
    1. اشكرك تامر على الاهتمام والمتابعة والرد

      حذف
  8. جميلة يا منة و تلقائية جدا و ده دليل على الصدق
    بس اقولك حاجة انتِ اهم ما يميزك ان جواكِ طفلة شقية علشان كده لولا انك قلتي سنك مكنش حد ممكن يعرفه :)
    بعدين يعني انا راضي ذمتك في بنت في الدنيا تقول عمرها كده ؟
    حبيت اجاباتك جدا و انا سعيد بحملة التدوين السنادي اللي عرفتني بمدونتك

    ردحذف
    الردود
    1. ربنا يخليك يا مصطفى كلامك ده شهادة اعتز بيها جدا
      و انا عجوزة فوق ما تتخيلوا :)
      و بعدين عادي بقى انا مش بتكسف من عمري ولا بحب اخبيه زي كل البنات
      و اديك قولت بنفسك طفلة
      انت عارف الاطفال بيحبوا يقولوا عمرهم و يتباهو بيه ديما
      مش مهم اكبر في السن بس ادعيلي مش اعجز من جوايا
      و تسلم على ردك الجميل :)

      حذف
  9. صباح الغاردينيا يامينو
    اممم بصي بقى النهردة حدلعك مش حقولك منمونة عشان منة التانية بدلعها منمونة يبقى انتي مينو بجد انتي فراولة بجمال روحك وطعمك الحلو لأنك انسانة شقية وطفلة صغننه من جوا ودا بحبه اوي في الانثى لانها لازم تحافظ على الطفلة الي جواها بجد بجد مبسوطة بحملة التدوين الي عرفتني عليكي ممكن يافراولة تديني فراولة عشان اديكي غاردينيا :)"
    ؛؛
    ؛
    لروحك عبق الغاردينيا
    كانت هنا
    reemaas

    ردحذف
    الردود
    1. انتي بتدلعيني يا ريماس
      يا بختي يا بختي :)
      بصي انا مستعدة اجيب كل الفراولة اللي الاقيها و اجيلك و نقعد ناكلها سوى بس يا رب مش يبقى عندك حساسية زيي انا و رحاب :)
      انا سعيدة اوي اني اتعرفت عليكي علشان انتي بنوتة رقيقة اوي و جميلة خالص من جواكي
      و يا رب ديما يديم المحبة و المعرفة في الخير باذن الله :)

      حذف
  10. مبسوط إنيعرفت مدونتك وإني اتعرفت عليكي اكتر ف التدوينة دي

    بالتوفيق دايما

    ردحذف
    الردود
    1. انا الاسعد يا ضياء و يا رب ديما معرفة في الخير :)

      حذف
  11. حبيت طريقتك في الكلام عن نفسك، و سعيد باللي عرفته عنك..دايما يارب بالتوفيق..و كل السعادة و النجاح..تحياتي

    ردحذف
    الردود
    1. ربنا يكرمك يا احمد انا الاسعد اني عرفتكم كلكم و الله :)

      حذف
  12. تشرفت بمعرفتك كثيرا يا باشمهندسه
    ولا أقولك هقولك برده يا منه
    حقا سعيد بمتابعتك
    تقبلى تحياتى

    ردحذف
    الردود
    1. انا الاسعد والله
      و قولي يا منة
      احسن بحس لقب بشمهندسة ده واسع عليا اوي
      و بعدين بقولكم عيلة صغيرة مينفعش تنادوني بالقاب اصلا :)

      حذف
  13. اولا تشرفت بمعرفتك في الحمله الجميله وبمعرفة مدونتك
    ثانيا ارغي براحتك من حق كل واحد فينا يرغي في مدونته
    وعلى فكره في ناس كتير بتحب تسمع وتعرف وانا استمتعت جدا
    باني اكون موجود في مدونتك
    تحياتي

    ردحذف
    الردود
    1. انا بشكرك جدا على زيارتك لمدونتي
      بجد شرفتني
      وبلاش انا تخلوني ارغي احسن انا كلامي كتير اوي اوي حتزهقوا مني وانا مش عاوزة اطفشكم انا ما صدقت لاقيت ناس حلوين زيكم يبقوا معايا و ينوروني هنا :)

      حذف