الخميس، 12 يوليو، 2012

الحر يعمل اكتر من كده... في صلاح سالم




انه احدى ايام شهر يوليو الحارة ... كنت عائدة من عملي ... يكاد القيظ و الشمس المحرقة ان ......

ايييييييييييييييييييييييييييييييييييييييييييييييه ... بس بس بس ... قيظ ايه و حارقة مين؟ !! لا انا النهاردة مش جاية اقول كلام مكلكع ذي بتاع كل يوم ...انا جاية ادردش معاكم حبة ... الا انتم اخباركم ايه يا جماعة؟ وحشيني والله ...عاملين ايه في الحر الفظيع ده؟ ... انا جاية النهاردة الصراحة من الشغل والجو كان بشع ... لا ده كمان اصلا من الصبح وانا بقوم من النوم حاسة ان في حد دخل الشمس تبات معايا في نفس ذات الاوضة بتاعتي ....مانتم عارفين مش بعرف انام في التكييف ... انا اصلا عدوة التكييف والجلوس في الاماكن المغلقة ... بس المضطر ... يركب كارير
و انا في الشغل مش استحملت الصراحة بعد ما طلعت من الموقع اضطريت اضحي واقفل الشباك وافتح التكييف ...فضلت طول اليوم واحشني ريحة الهوا الطبيعي و قاتلني ريحة الهوا المفريون (انا بسمي هوا التكييف كده نسبة الي الفريون) ... بس الصراحة الجو مكنش ينفع معاه غير كده ... دانا كنت حفطس وانا خارجة من المكتب لحد ما وصلت العربية ... واول ما ركبت السواق استغرب لما قولتله يفتح التكييف ... لانه عارف اني بتخنق من العربية المقفولة ... بس العربية المقفولة احسن من جهنم المفتوحة برة دي ... و احنا مشوارنا بعييييييييييييييييييييييد ... من مدينة العبور حتى منطقة وسط القاهرة ... متخيلين كل الطريق ده في الجو ده ... من غير تكييف ... ده يبقى انتحار رسمي
المهم بقى واحنا في الطريق و تحديدا في شارع صلاح سالم ... يوجد نافورة قريبة من مستشفى الجلاء العسكري ... قبل الكوبري على طول (في ناس بتقول عليه كوبري الجلاء و ناس تقول الطيران ... بالنسبة بقى لواحدة جاهلة في جغرافيا شوارع القاهرة و مصر كلها زي حالاتي ... فانا بسميه الكوبري اللي في صلاح سالم جنب النافورة والتمثال ) ما علينا... نرجع للنافورة ... شوفت جوة النافورة دي منظر فطسني من الضحك ... عيلين صغيرين عمرهم مش اكتر من 8 سنين ... قالعين هدومهم و نازلين بلبطة في الماية ولا كانهم في حمام سباحة شيراتون النافورة ... و فرحانين اوي ...
الصراحة معاهم حق ... و الله انا شخصيا اتمنيت اقدر اعمل زيهم كده ... و طبعا لانها فكرة مستحيلة التنفيذ فطردتها من دماغي فورا و قولت لنفسي : مش مشكلة ملحوقة ... اول ما اروح البيت حاخد البانيو بالحضن المهم كملنا الطريق و قبل النفق الصغير اللي بعد الكوبري اللي برضه معرفش اسمه في صلاح سالم ... وقف الطريق... لا بقى ... حرام عليكم ... انا مش ناقصة ... كفاية الحر ... ده فاضل حبة صغيرة و نوصل البيت بقى ... طب هو الطريق وقف ليه؟ ... اتاري في عربيتين زنقوا على بعض ... لا محدش خبط التاني ولا حاجة ... بس حبة غلاسة ... على حبة خنقة ... على الحر اللي واكل دماغ الناس ... نزل واحد فيهم و اتنرفز على التاني ...فالتاني كبرت في دماغه و قام نازل هو كمان و قال ايه حيتخنقوا ... يعني انتم مش حبكت معاكم تتخنقوا الا في الجو ده و الشمس دي ؟ طب ما تتخنقوا في حتة ضل شوية ... واحد عاقل ابن حلال نزل كلم كل واحد في الاتنين فرجعوا عربياتهم تاني ... تلاقيه قالهم الدنيا حر ارجعوا اقعدوا في التكييف بتاع العربية و بلاش شغل عيال ... فهم ما صدقوا ورجعوا على طول ...
الحمد لله وصلنا البيت ... دخلت العمارة بسرعة علشان اهرب من الشمس و انا داخلة حبيت اقول للبواب السلام عليكم طلعت مني شوية اصوات غريبة تشبه الفحيح المفروض يعني انه يفهم اني بقوله السلام عليكم ... واتاريه هو كمان رد عليا باصوات غير مفهومة تخيلت انا انه بيرد بيها السلام ....و ركبت الاسانسير اللي تقريبا اتحول لفرن كبير بيشووا فيه السكان
لا لا لا ... انا مش مصدقة ... باب الشقة ... اخيرا دخلت البيت .... اللي كان برغم الحر برضه ارحم من اي حتة تانية في الشارع بمليون مرة ... اول ما دخلت  رميت جسمي على الكنبة الصغيرة اللي جنب الباب و قعدت ابحلق في السقف ... وانا بانهج كاني لسة خارجة من ماراثون عالمي ... و فاجاة افتكرت حاجة مهمة جدا ... جريت على الحمام ووقفت ابصله و انا سعيدة ... ببصله كده بنظرات ماليها الحب العميق ... البانيو ... كان فاضلي بس يطلع من فوق راسي قلوب حمرا و بمبي صغننة زي اللي بتطلع في افلام الكارتون ... وانا بقول ...آبانيو آحبيبي
و للصدف القدرية بقى ... ماما تكون معدية في نفس ذات اللحظة من قدام بابا الحمام و تسمعني و تشوفني وانا حاطة ايدي على قلبي وواقفة ابص بوله شديد لبانيو حبي انا
- لا حول ولا قوة الا بالله ... البت اتهبلت خلاص 
انا مش زعلت من كلمة اتهبلت ...اد ما زعلت انها قطعت عليا اللحظة الرومنسيكية المميزة بيني و بين بانيوحبنا ... ولاقيت نفسي بقولها
- معلش يا حجة ... الحر بيعمل اكتر من كده ... في صلاح سالم

هناك 20 تعليقًا:

  1. هههههههههههههههههههههههههههههههههههههههههههه
    ابانيو احبيبي
    مش ممكن - ايه ده ولا احمد رجب في زمانه - الظاهر ان الحر لعب لعبته معاكي وجبلك الوحي الساخر لحد عندك
    بصراحة الله يكون في عونكم انا مش عارف انتو عايشين في القاهرة دي ازاي
    بس تسلم بنات افكارك بوست اخر مليون حاجة

    ردحذف
    الردود
    1. سعيدة انه عجبك
      الصراحة كنت بنزله وانا خايفة انا بخرج من اطار و اسلوب كتابة لاسلوب تاني ... و بخاف تتعودوا عليا في اطار واحد لاني زي ما قولت قبل كده مليش اسلوب ثابت
      و كمان بخاف حد يقارن حاجة بحاجة تانية
      يعني مثلا التدوينة دي من ناحية اللغة اضعف كتير من اي حاجة تانية كتابتها لانها عامية
      و في حاجات تانية بتبقى اقل في السلاسة او فيها حتة تعقيد
      بس لما بتعجبكم التدوينات على مختلف اساليبها بحس اني الحمد لله نجحت
      بشكرك كالعادة انك بتابعني و بتشجعني و بتديني دفعات معنوية رائعة :)

      حذف
  2. هههههههههههههههههههههههههههههههه
    انتى بجد مشكلة ايه السكر والعسل ده
    وسرد الاحداث الساخر ده يجنن
    جميييييييييييييييل اووووووووووووووى
    والحر يعمل اكتر من كده:)))

    ردحذف
    الردود
    1. ميرسي يا اميرة
      انتي اللي سكر والله
      وحشني تعليقاتك الحلوة
      يا رب ديما عجباكي كلماتي :)

      حذف
  3. ابانيو احبيبي...الحر يخليك تتخيل خالتك حتة طرشي و تقرقشها.......تسلمي انك فكرتيني بالحر يا منة دمت بود

    ردحذف
    الردود
    1. هههههههههههههه
      بالهنا و الشفا
      اي خدعة بقى
      يا رب تكون عجبتك بس :)

      حذف
  4. محمد المصري12 يوليو، 2012 3:17 م

    وبعد سنتين جيت اخش الشقة بعد الحر ده النور كان قاطع
    للعلم وانا لسه بكتب الكلام ده فعلا النور قطع عليا والتكييف وقف من حفر حفرة لاخيه
    بركاتك يا شيخة ماجدة

    ردحذف
    الردود
    1. محمد الحر عندك يبقى جهنم بجد
      ربنا يكون في عونك
      علشان تبطل تزعلني

      حذف
    2. محمد المصري12 يوليو، 2012 3:37 م

      الحمد لله رجع

      حذف
    3. مش مشكلة الصيف لسة طويل

      حذف
  5. صباح الغاردينيا مينو
    هههههههههههههههه
    ههههههههههههههه
    البت سخنة وبدأت تخرف
    ايه دا يامينو ياحبيبتي راح شبابك هدر هههههه
    اخرتها قصة حب مع ابانيو :)
    يلا على الاقل تسخنيه وتبرديه على كيفك ههههههههههه
    بجد بجد ضحكت من قلبي وتخيلت منظرك وانتي واقفة على باب الحمام بتعاكسي المحروس بانيو :) "
    ؛؛
    ؛
    لروحك عبق الغاردينيا
    كانت هنا
    Reemaas

    ردحذف
    الردود
    1. الحر اللي انا فيه يخليني اعاكس ازازة ماية ساقعة في التلاجة يا ريماس :)
      مبسوطة انها عجبتك و ضحكتك يا جميل :)

      حذف
  6. ههههههههههه فظيعة
    هو الحر بيطلع الجمال ده
    وعجبنى جدا وانتى بتحبى فى البانيو هو يستاهل بصراحة
    الجو السنة دى ررررهيب
    جميل اسلوبك فى الدردشة بحبه :)

    ردحذف
    الردود
    1. الحر بيعمل اكتر من كده بمراحل يا اية :)
      مبسوطة انها عجبتك :)
      و ميرسي على ردك الجميل :)

      حذف
  7. ههههههههههههههههههههه والله انتى عسل يا منه
    ضحكتينى اوووى
    وعجبتنى اول حته كده وبعدين روحتى خطفانى للكلام العادى اللى حسيت صوتك فيه اصلا
    لا والا شيراتون النافوره دى ههههههههههههههه
    انا مش عارفه الواحد هيعمل ايه فى رمضان ربنا يستر :(
    سيبك انتى
    اسلوبك سكر خالص زيك كده ^_^

    ردحذف
    الردود
    1. و الله اني اللي سكر وعسل خالص يا قمر :)
      مش متخيلة انا ببقى سعيدة اد ايه لما بقرا كلامكم الحلو ده :)
      و ربنا يستر على رمضان
      انتي اللي سيبك دانتي منورة المدونة كلها و مشرفاني بوجودك وتعليقاتك الجميلة يا حبيبتي :)

      حذف
  8. ههههههههههههه هههههههههههههههههههههه
    عسل والله يا منة

    ردحذف
    الردود
    1. ميرسي يا فندم :)

      حذف
    2. معقول حد يدخل هنا وما يضحكش ؟؟
      ههههههههههه ..
      طيب حمام الهنا والسعادة ..
      دمت بألف خير ..

      حذف
    3. :)
      و الله بجد انا بنبسط لما تضحكوا كده
      الله يعافيك :)
      ميرسي على المتابعة و الردود الجميلة تحياتي ليك :)

      حذف