الأحد، 15 يوليو 2012

مطلوب عريس




اولا احب اقول الحمد لله انا حتة الجنان اللي جوايا رجعت تاني من خلال كتابتي و ده محسسني اني بدات استرد نفسي ... عقبال ما الاقيها كلها لاحسن كنت خايفة تضيع مني للابد
ثانيا بقى
هذا المقال اهداء خاص مني الي كل الاخوة الاعزاء اصحاب الدم الخفيف ... اوي ... اللطيف ... اوي ... اللي كل ما يشوفوا وش حضرتي ... معندهمش غير الاسئلة دي :
- انتي ليه مش اتجوزتي لحد دلوقتي؟
- انتي فسخي خطوبتك الاولنية ليه؟
- انتي بترفضي كل عريس بيتقدملك ليه؟
اخيرا اخيرا يعني ... قررت اعبركم وارد على اسئلتكم المستفذة دي ... رد واحد ملوش تاني ... بس ده اخر رد و رد من الاخر ... يعني محدش يسالني تاني بعد ما يقرا الكلام ده


اولا الحمد لله انا انسانة طبيعية زي كل انسانة خلقها ربنا سبحانه و تعالى ... عندي احلام و طموحات كتير منها اني اكون زوجة و ام ... بس طبعا لاني انسانة عاقلة (بيقولوا كده يعني) فانا معنديش استعداد اني -اكروت - احلامي ... يا اما انفذ احلامي صح ... يا اما بلاش احسن
اني اخلي طموحي مجرد حلم وردي جميل و هدف باسعى لتحقيقه بالطريقة الصح احسن من اني اقبل باي شخص يشاركني الحلم ده و الطموح ده و يبوظهولي و يحوله لكابوس
اه انا نفسي يكون ليا شريك لحياتي ... بس مش اي راجل والسلام ... مش اي واحد يجي في سكتي ينفع اكمل معاه حياتي ... اه انا نفسي يبقى عندي اي لاولادي(اللي ربنا حيرزقني بيهم باذن الله) لكن مش اي راجل يستاهل يكون ابو الولاد الحلوين اللي نفسي يبقوا عندي ... انا ربنا حيديني هدية عظيمة لو بعتلي الولاد دول ... و اقل هدية ممكن اقدمهالهم انا بقى اني اختارلهم اب كويس ...
كمان انا مش عندي الهاجس المجنون اللي عند معظم البنات بتاع لو مش اتجوزتي حتعنسي ... والناس حتقول عليكي ايه ... و الكلام الفارغ ده .... يعني هو ربنا لو كان كاتبلي رزق حد حيقدر يمنعه عني ... ولا لو كان مش كاتبهولي لشحتفة بتاعة البنالت والشقلبة بتاعتهم حتجيبهولي؟ طبعا لا ...الحمد لله على رزق ربنا و كل اللي بيكتبه للواحد خير ... انا بس باخد بالاسباب و احاول اني مش اختار شخص غلط .... وربنا اللي بيوفق في الاخر ...محدش بيعاند ربنا على فكرة
انما بقى الناس الظريفة بتاعة ابقى ادي العرسان فرصة و الخطوبة فرصة تدرسوا بعض و جربي مش حتخسري .... فاحب اقولكم ... ان انا عمري ما ندمت على حاجة في حياتي الا ندمي من اني فكرت مرة اسمع كلامكم ...في جوابات بتبان من عنوانها ... اللي مش يعرف يقرا ابقى يستاهل اللي يجراله ...و انا مرة قريت العنوان وكانت اول القصيدة كفر .... بس عملت نفسي عبيطة و مش واخدة بالي ... وكانت لنتيجة ...خطوبة مفسوخة مع خالص تحياتي .... لاني ببساطة مش قدرت اكدب على نفسي و اكمل مع حد مش مناسب ليا تماما .... مش حقول غير انه غير مناسب ليا و مش حقول التفاصيل اللي خالتني ابعتله دبلته ووراها قلة من النوع القناوي الاصيل ....ان الله حليم ستار برضه
و علشان اثبتلكم اني مش مريضة نفسية او معقدا نفسيا .... فانا حعلنها اهوه .... مطلوب عريس ....بس بشروط .... مطلوب شخص محترم .... مش طرطور .... مطلوب انسان .... مش حيوان .... مطلوب قلب وعقل ... مش معدة و فردة باتا شمال ... مطلوب فكر ... مش شكل .... مطلوب واحد ملو هدومه اخلاق ... مش ملو جيوبه فلوس .... مطلوب دين و علم ... مش شقة وعربية ....مطلوب قرش حلال ... مش مليون مصحوبة باللعنات .... مطلوب صدر حنين ... مش سي السيد .... مطلوب حد يحترمني .... واحترمه .... يقدرني .... واقدره .... ولاده يفخروا بيه .... ويحبوني لاني خليته ابوهم .... مطلوب شخصية تقدر اهلها و تحترمهم .... بس برضه يبقى فاهم ان الاحترام مش معناه انه يكلم الوالدة كل خمس دقايق يحكيلها كل اللي حصل بالظبط و يكلم الوالد يستاذنه قبل ما يقولي ازيك عاملة ايه ....مطلوب واحد يديني حريتي بس يهتم بيا ... مطلوب واحد اديله حريته بس ميزعلش لما اغير عليه حبة صغننة .... مطلوب حد يحترم دماغي ...قبل شكلي .... يقدر قلبي ...قبل لبسي ....باختصار كده ...مطلوب راجل
لو لاقيته حد بالمواصفات دي ...خلوه يروح يكلم ماما اهو يبقالكم اي فايدة بدل اسئلتكم السخيفة اللي دوشيني بيها ... لو ملقيتوش بقى ...تقعدوا ساكتين خالص و ارحموني و ارحموا نفسكم من كل السخافات دي
بس وعد يعني ... انا لو لاقيت الرجل الاسطوي ده ...لامسك فيه بايدي وسناني ....و اقفش في زومارة رقبته ... ولا اسيبوش الا قدام عمو الماذون وهو بيقوله وانا قبلت الزواج منها .... و لو حاول يخلع .... حصرخ بعلو صوتي ... عريييييييييييييييييييييس يا اماااااااااااااااااااااااااي .... طخيه .... بس بشويش والنبي :))

هناك 38 تعليقًا:

  1. شريفة فاضل15 يوليو 2012 3:23 م

    helwa
    kalam men elakher
    best wishes

    ردحذف
    الردود
    1. احب اهنيكى على مقالك ..عجبنى بجد ..كمان حلمك بسيط و مش مستحيل ،إن شاء الله تلاقيكى حلمك الجميل

      حذف
  2. هههههههههههههههههههههههه انتى فظيييييييييييعه
    والله مش لوحدك اللى بتستفزى بالكلام ده
    ياااااااربى وصفتى وقولتى كلام نفسى اقوله بجد
    بحترم عقليتك وتفكيرك
    وربنا يرزقك بالانسان اللى يقدرك ويحترمك ويعيشك فى سعادة دايمة وولادك يفتخروا انه ابوهم ان شاء الله
    :))))

    ردحذف
    الردود
    1. و الله يا ميرو تعبوني قولت اكتب التدوينة دي علشان اللي يسالني الاسئلة البايخة دي تاني ابعتله التدوينة اهو منها اهزقه و منها ارحم نفسي من الشرح كل شوي D:
      مبسوطة انها عجبتك يا حبي منوراني :*

      حذف
  3. ههههههههههههههههههههههههههههههههههههههه
    اولا انا سعيد جدا انك اعترفتي اهه ان حتة الجنان اللي جواكي ابتدت ترجع تاني وده شئ كويس لانك كده ابتديتي ترجعي لنفسك مرة تانية وفي نفس الوقت تمتعينا بالجنان ده - ثانيا قرارتنا لازم تكون نابعة مننا لاننا اللي هانفذ القرار مش حد غيرنا صحيح لازم نستشير وما خاب من استشار انما في الاخر نعمل اللي مقتنعين بيه وده الاهم ثالثا بقي ربنا يرزقك بالخير دايما الخير بمعناه الواسع من غير تخصيص
    تحياتي لجنانك
    تقبلي مروري

    ردحذف
    الردود
    1. ميرسي يافندم و طبعا حضرتك ليك دور في عودة الجنان ده بسبب تشجيعي ديما على الجنان :)
      ربنا يكرمنا جميعا بكل ما هو خير :)
      منورني ديما و سعيدة بوجودك جدا :)

      حذف
  4. كمان انا مش عندي الهاجس المجنون اللي عند معظم البنات بتاع لو مش اتجوزتي حتعنسي ... والناس حتقول عليكي ايه ... و الكلام الفارغ ده


    معلومة!: القلق ده بيبثى عند الاهل لانهم المتحكمين الاوللانيين والاخرانيين في كل ما يخص حياتك الشخصية اللي المفروض ماحدش يتحكم فيها , و ده بيقلقهم وطبعا مايهمهمش موضوع انسان وحيوان و نبات ده المهم هيعيشك وبيعرف يصرف.

    بمنطق الازل الحب بيجي بعد الجواز و انا مش عارف مين الحمار اللي اخترع المثل ده؟

    بس لازم تصارعي لحقك ده وانا اشجعك تحياتي :)

    ردحذف
    الردود
    1. انا كمان نفسي اعرف الحمار ده :(
      انا مش حصارع ولا حاجة انا منتظرة مش حجري ورا رزق مش بتاعي
      واللي كاتبهولي ربنا حيجي لحد عندي انا بس ممكن لو لاقيت الشخص الصح اصارع اي حاجة حتى نفسي علشان استحق الحصول عليه
      من غير ما اقلل من نفسي او احاول اعاند ربنا

      حذف
  5. صباح الغاردينيا مينو
    ههههههههههههههههه بجد انتي مجنونة بس الجنان الحلو وانا على فكرة دايما جنب الجنان لأني مجنونة عشان كدا هقولك تجنني يابنتي والله الجنان هو الي مصبرنا على الدنيا دي بس عارفة الرجل الي بتتكلمي عنه دا موجود لما قلبك يحبه ويحسه ويحتويكي بمشاعره حتحبي كل حاجة فيه لما قلبك يختاره مش الناس ولما قلبك يحسه مش زوج والسلام وصدقيني أجمل إحساس في الدنيا أنك تختاري شريك عمرك بقلبك وعقلك وأنتي عارفة أنه دا الي انتي عاوزة تكملي عمرك معاه ..
    مينو تعالي جنبي عاوزة اوشوشك ههههههههه بس اوعي حد يسمعنا انا برشح لك عريس لقطه وبيجي هنا كل يوم ومتأكدة انه مناسب وفيه كل صفاتك هو ................
    .........................
    ....................... بلاش بقى تعالي نستخبى ورا المدونة عشان أقولك ههههههههههههه "
    ؛؛
    ؛
    لروحك عبق الغاردينيا
    كانت هنا
    reemaas

    ردحذف
    الردود
    1. ايه ده ايه ده ...انتي حتشتغلي خطبة :)
      هههههههههههههههههه
      كل اللي قولتيه عن الجنان صح
      وانا مش كنت بتكلم عن ناس بترشحلي عريس اد الناس اللي بتضغط عليا علشان ارتبط بحد هم مقتنعين ان هو مناسب انا بقى مقتنعة بايه مش مهم
      المهم بقى فين العريس اللي بترشحيه علشان انا واثقة من زوقك D=
      عريس يامااااااااااااااااااي

      حذف
  6. سامية جمال15 يوليو 2012 3:56 م

    ولسوف يعطيك ربك فترضي

    ردحذف
    الردود
    1. الحمد لله على كل حال
      يا ابني انا مش بشحت عريس انا بس بشرح وجهة نظري

      حذف
    2. سامية جمال16 يوليو 2012 6:36 ص

      وماله وجهة نظرك علي راسنا من فوق دا احنا نتمنالك ما ترتضيه وتنبسطي معاه ويحقق لك كل اللي تتمنيه

      حذف
    3. لو شبه اللي في بالي يبقى قلته احسن

      حذف
  7. هههههههههههههههه
    عريس يا امااااااااااي بس طخية بالراحة
    والله معاكي حق
    عجبني كلامك كله
    ومتعبريش حد دي ناس عبيطة
    بيفكروني لما اختي اللي اصغر مني اتجوزت وقالولي انت مش زعلانة ان الصغيرة اتجوزت قبلك....؟
    قلت لهم بكل بساطة
    كنت هزعل لو اتجوزت انا قبلها عشان كان نفسي اشوف فرحها قبلي

    ردحذف
    الردود
    1. ربنا يخليكم لبعض يا قمر وافرح بكل البنانيت اللي اعرفهم او افرح فيهم عادي بقى :)
      انا كمان لما ماما تقولي عاوزاكي تتجوزي بقولها اطمن على اخواتي الصغيرين الاول :)
      منوراني يا حبي :)

      حذف
  8. عارفة اول ما يجى الشخص الصح
    هتلاقى ربنا يسر الامور كدا لوحدها
    وطلباتك مش مستحيلة ولا حاجة انا كنت بقول زيك كدا
    وان كل الصفات مش ممكن تتوفر فى حد واحد
    لحد ما ربنا بعتهولى الحمد لله
    افضلى على قناعاتك علشان اولادك يستاهلوا تصبرى
    مفيش حد هيعيش مكانك بعد بكدا ولا هيحس بإختيارك غيرك
    ربنا يوفقك ويكتبلك السعادة فى حياتك يارب

    ردحذف
    الردود
    1. ربنا يكرمك يا اية يا رب و يفرحنا بيكي ديما و يا رب على طول ربنا يرزقك بكل خير :)
      انا ثقتي بالله بدون حدود و حتى لو عمري ما اتجوزت حعرف ان ده الخير اللي كتبهولي ربنا و ححمده عليه و حبقى فرحان

      منوراني ديما و مفرحاني ردودك :)

      حذف
  9. انتي صح
    وده مش جنان خالص خالص خالص
    ده العقل ودي الطريقه الصح

    وسيبك من الناس ومن أي حاجه
    وان شاء الله هتلاقي البطل الاسطوري ده على أرض الواقع
    ربنا يسعدك يارب ^_^

    ردحذف
    الردود
    1. ربنا يسعدك و يخليكي ليا :)
      نورتيني واسعدتيني بردك الجميل :)

      حذف
  10. مبدأيا كده انتى عسل بردو
    وانا بحب اسلوبك اوى :)

    حقك انك تطلبى المواصفات دى مش جنان ولا حاجه مستحيله
    دى حقوقك المشروعه اللى من حقك تطلبيها
    ده هيبقى شريك حياتك يعنى حد هتكملى معاه بقيه عمرك وهيبقى اب لاولادك ودى حاجه مش سهله ابدا
    انتى اللى بتختارى لاولادك اللى لسه اصلا ماجوش وده محتاج تفكير صح اوى زى اللى انتى بتفكريه ده دلوقتى
    اصبرى واكيد ربنا هيبعتلك اللى فى نيتك لانه مش مستحيل
    ووقت ما يجيلك من غير حاجه هتحسى ان هو ده بالظبط اللى كنتى بتتمنيه
    ربنا يوفقك و يسعدك يا جميله يارب :)

    ردحذف
    الردود
    1. مبدئيا يعني
      اهو انتي اللي عسل :)
      الحمد لله على كل شئ يقدره ربنا و زي ما قولت فوك انا مش حعاند ربنا انا بس حتحرى الشخص المناسب ولو ربنا كتبهولي الحمد لله ولو لا يبقى خير برضه ربنا مش بيعمل الا الخير بس احنا مش بنبقى فاهمين اوي يعني
      ربنا يسعدك و يخليكي و تنوريني ديما و تفرحيني بوجودك و ميحرمنيش من تعليقاتك اللي زي السكر زيك :)

      حذف
  11. هههههههههههه
    بجد بجد كلامك زى العسل .. وعندك حق الناس دول مستفزين اوييي بس انا لسة مجربتهومش .. بس اطمنى انا حتى مش بتجيلي الجرأة اسأل حد متجوزتيش لحد دلوقت ليه .. لعل وعسى قدرها لسة مجاش..ومعاكى جدا ومؤمنة بأن اللى ربنا عاوزه هيكون مهما كان ايه .. وهيبقى الخير ايا كان بإذن الله
    واتمنالك من قلبي تلاقي الراجل اللى بالمواصفات دي انتى وكل البنات العساسيل اللى زيك ان شاء الله *_^

    ردحذف
    الردود
    1. انتي اللي عسل على فكرة :)
      و ربنا يبعد عنك الناس دي لاحسن دول عالم رخمة ببقى نفسي احدفهم باي حاجة والله لما يبداوا اسئلتهم اللطيفة دي
      ربنا يسعدك يا قمر و يرزقك بكل خير :)

      حذف
  12. مين اللى قال ان الكلام ده جنان
    بالعكس انا شايفه عين العقل
    وياريت كل البنات والولاد يفكروا بالطريقه دى مش هيكون فيه 300 الف حالة طلاق سنويا وفكك من اى حد يخنق عليكى بالاسئله دى
    بوست جميل تحياتى

    ردحذف
    الردود
    1. ربنا يكرمك يا محمد وهو ده بالظبط اللي برد على الناس بيه اقعد من غير جواز احسن مليون مرة ما اتجوز شخص غلط واجيب منه طقل و اطلق واعيش ابني او بنتي في جحيم الطلاق
      و اشيل ذنبه وذنبي
      ما هو كده يا نختار صح يا بلاش احسن
      و في الاول والاخر التوفيق بتاع ربنا سبحانه وتعالى بس المهم نجتهد علشان نختار صح
      نورتني و شرفني ردك :)

      حذف
  13. مبروك الجنان .. ربنا يخليهولك D:

    أحب أحبطك وأقولك إنك لو فاكرة بعد الكلام ده هتخلصي من الاسئلة والحوارات فانتي غلطانة .. مفيش فايدة D:

    ربنا يا ستي يعترك براجل يراعي فيكي ربنا وفيه كل الحاجات سالفة الذكر فوق هناك دي D:
    اه ,, ويكون مجنون زيك كدة

    بالتوفيق دايما

    ردحذف
    الردود
    1. لا مش احباط ولا حاجة انا بس اللي حيسالني بعد كده بدل ما اجاوب عليه حقريه التدوينة بس كده :)
      و يا سيدي يبعت ولا ميبعتش ولا ما بتفرق
      دانا كده زي الفل الحمد لله وربنا اكيد بيجيبلي الاحسن الحمد لله

      حذف
  14. احلى حاجة بقى وانا بقرا تعليقاتكم وفي الخلفية منير حبيب قلبي بيغني ربك لما يريد
    الجو ماشي مع بعضه خالص خالص
    احلى حاجة بقى اني مش اتشتمت زي ما كنت متوقعة ... لا كلكم موافيني وكمان ريماس جيبالي عريس هههههههههههه
    دانا مرزقة بقى :)

    ردحذف
  15. مساء الورد Menna

    هذا موضوع شائع وفضول البشر وتدخلهم فيما لا يعنيهم

    سبب لكل مشاكلنا وهذا لا يواجه المرأة فقط حتى الرجل

    له نصيب وافر جداً من هذا الفضول والحشلاية التي تنغص

    عليه حياته وللأسف كثير جداً يتهورون في قراراتهم فقط

    لإسكات هذه الألسنة والعيون ...

    كوني كما تحبين ولا تفكري بأحد فأبنائك أولى بهذه

    المساحة من التفكير بأختيارك الرائع لوالدهم ...

    تمنياتي لك بحياة سعيدة ..

    تحياتي وإحترامي

    ردحذف
    الردود
    1. اشكرك على المرور والرد الذي اسعدني
      وفقنا الله جميعا لكل ما يرضيه والحمد لله على كل نعمه و كل ما قدر لنا
      تحياتي

      حذف
  16. ههههههههههههههههه
    بجد ضحكتينى فى الاخر كتير
    وكلامك عين العقل والمنطق وانا بقول بعلو صوتى محدش هيعيش حياتى غيرى يبقى انا اللى اختار عريسى وبشروطى البسيطة دى
    سكة السلامة ولا جوازة الندامة
    قعدة البيت ولا جواز على ورقة طلاق

    ردحذف
    الردود
    1. و قاعدة الخزانة ولا جوازة الندامة
      الا قولي انت تعرف ماما؟ :)

      حذف
  17. رائعه جدا يامنه فعلا كل انسان من حقه انه يرسم صوره لشريك حياته ده لا شيء من الجنون ولا شيء من الغطرسه والتكبر وميعيبش اي حد للاسف كتير الوحد لما بيكلم عن الانسانه اللى في خياله ونفسه يرتبط بيها بيقولك ده شايف نفسه او دي شايفه نفسها بس دي عمر واولاد وعشره وحتى احنا معشر بني ادم ان الواحد يجوز ويطلق ويبقى في اطفال في النص ملهمش ذنب او مفيش اطفال بس هيحس بتنيب الضمير طب على ايه كل ده فعلا الحياه بنعشها مره واحد واحنا الناس الوحيده اللى بنتعاقب بنتيجة افعالنا وقراراتنا يانعيش صح ونختار صح يابلاها جميله جدا يامنه كنت لسه بفكر في الموضوع ده النهرده

    ردحذف
    الردود
    1. ربنا يوفقنا جميعا للخير واحنا بنجتهد و ربنا بيرزقنا بالخير في الاخر
      اشكرك على متابعتك و تعليقك الجميل يا شريف :)

      حذف
  18. وعسى حرمانك من زواج "بركه"
    وعسى طلاقك من زوجك "راحه"
    وعس...ى ردك عن وظيفه "مصلحه"
    وعسى حرمانك من طفل "خير"
    ... ... وعسى أن تكرھوا شيئاً وهو خيرٌ لكم لأن الله يعلم وأنت لا تعلم

    فلا تتضايق لأي شئ يحدث لك لأنه بإذن الله خير.. يُقآل : لا تكثر من الشكوى فيأتيك الهم ولكن أكثر من الحمد لله تأتيك السعاده

    فالحمدلله ثم الحمدلله ثم الحمدلله حتى يبلغ الحمد منتهاه نحنُ بخير
    مَا دُمنا نستطيع النوم بدُون مُسكنٱت !
    ۉلآ نَستيقظ عَلى صَوت جھآز طِبي مَوصُول بـٱجسادنا !

    الحمدلله ثم الحمدللّه ثم الحمدلڶه حتىى يبلغ الحمد منتهاه لا تنظر الَى الْخلف فَفِيه مَاض يزعِجك ولَا تنظر الَى الْامام فَفِيه مُسْتقبل يُقلقك لَكن انظر الَى الاعلى فَهناك رَب يُسعدك...

    " وَتَوَكَّلْ عَلَى الْحَيِّ الَّذِي لا يَمُوتُ وَسَبِّحْ بِحَمْدِهِ وَكَفَى بِهِ بِذُنُوبِ عِبَادِهِ خَبِيرًا "

    ردحذف