الجمعة، 27 يوليو، 2012

مذكرات فراولة VS يوميات كاتبة فاشلة جدا (1)



الحلقة الاولى
اول يوم رمضان


1 رمضان 1433
20 يوليو 2012


مساء الخير ... احب اعرفكم بنفسي... انا فراولة ... اولا احب اقولكم ان انا مش شخصية عامة... و لا معروفة ... و لا حتى حد مهم ... و مش عندي مرض نفسي ... ولا مصابة بجنون العظمة ... اومال بكتب مذكراتي ليه؟ مش عارفة .. يمكن عشان في احداث غريبة بشوفها او بعيشها و محتاجة اتكلم عنها ... و يمكن كمان علشان في شخصية جديرة بالكلام عنها حعرفكم بيها و اخليها تكلمكم عن نفسها ... الانسة (م) ... مين دي؟!... لا مش وقته دي بقى حبقى اقولكم عليها في الاخر 
المهم دلوقتي ...النهاردة كان اول يوم رمضان ... النهاردة؟!!! انا عارفة اني منزلة المذكرات متاخرة كام يوم لظروف قهرية ... ما علينا ... المهم... رمضان؟!!! هو فين رمضان ؟... انا مش حسيت برمضان خالص... يمكن علشان مش عندي فانوس؟... بقالي كتير محدش جابلي فانوس ...انا اللي بجيب دلوقتي لاولاد الناس اللي اعرفهم ... اما انا فلم اعد امتلك الا اخر فانوس ماما اشترتهولي و انا في الاعدادية تقريبا .... ياااااااااااااااااااااااااه .... طيب
يمكن كمان لاني مقاطعة التلفزيون مقاطعة تامة بعد ان قامت المسلسلات الرمضانية بتحويل الشهر المعظم الي شهر اباحي ... بس انا فعلا مقاطعة التلفزيون من سنين ... لا جديد يعني
يمكن علشان الشوارع مش فيها زينة زي كل سنة ... اه فعلا ... ده حقيقي ... كل الشوارع تكاد تكون بلا زينة اصلا ودي حاجة ماثرة في نفسيتي جدا.... بس برضه مش ده كل حاجة
انا حاسة بحاجة كبيرة مش موجودة ... فرحة مسروقة ... حزن مكتوم ... حاجة كده ... مش عارفة بس مش حاسة ان في رمضان ... رمضان اتسرق مني السنة دي و انا بدور عليه ... يا ريت لو حد لقاه يرجعهولي ... نفسي افرح بيه زي زمان ... 
المهم دلوقتي جه وقت الانسة (م) و هي حتعرفكم بنفسها .... اتمنالكم وقت سعيد

**********************

فرصة


1 رمضان 1433
20 يوليو 2012

السلام عليكم ... في البداية احب ان اعرفكم بنفسي ... انا الانسة (م) ... لا تحتاجون ان تعرفوا اكثر من ذلك عني ... لا اسم ... لا سن... لا عنوان ...لا حرفة  ... فقط هواية ... فلقد قررت اليوم ان تكون لي هواية ... للجميع هوايات ...هناك من يرسم ... من يعزف الموسيقي ... من يهوى ممارسة رياضة ما ... و لقد جربت كل تلك الهوايات وفشلت بها فشلا زريعا ... انا لا اتقن كل تلك المهارات ...لذا فقد بحثت عن الهواية التي تلائمني ... و نظرا لاني ممن يتقنوا فن الكلام و (الرغي) فلقد قررت ان تكون هوايتي الكلمات ... كتابة الكلمات ... 
كم هو جميل لو صرت كاتبة معروفة ... اتكلم عما بداخلي ... و يقراه الجميع ... اتحدث عن افكاري و مشاعري ... و يتعلم منها الاخرون ... كما انها هواية ستجعلني يوما ما من المشاهير الذين يشار لهم بالبنان .... و يتهافت الناس للحصول على توقيعاتهم ...
انه شعور رائع حقا وهي هواية رائعة ...لقد وعدتني صديقتي فراولة ان تقدم اعمالي للجميع حتى يتعرفوا على كتاباتي و اشعاري وقصصي ... لم ترى فراولة او تقرا اي شئ مما كتبت لاني لم اكتب شئ بعد ... و لكنها قالت لي اني حسنة الحظ وقد جئتها بالوقت المناسب لانها تعاني من حالة جنون تجعلها قادرة على اتخاذ اي قرار غير عقلاني او منطقي ... مما يعني انها لن تمانع من نشر اعمالي التي لم تقراها بعد ... لم افهم ما يعنيه هذا الكلام و لكنه اسعدني على كل حال ... الان لم يتبقى سوى ان اختار ما سابدا به ... يجب ان اكتب شئ لتقوم فراولة بنشره ... لكني لم اجد الفكرة بعد ... ربما احتاج لبعض الوقت لاجد الافكار ... حسنا ... ساكتفي اليوم بكتابة هذا التعريف البسيط عني ... حتى اجد فكرة ملائمة لاعراضها على فراولة لتنشرها بمدونتها و بين اصدقائها 
فانتظروني 

هناك 8 تعليقات:

  1. جميلة على فكرة...

    بس مش لازم على فكرة تبقي مشهورة او عظيمة..عشان تكتبي مذكرات

    اغلب المذكرات العالمية المشهورة لناس اكتشفنا عظمتهم بعد ما رحلوا من مضكراتهم وتركوا علامة في تاريخناو حياتنا وبصمة مميزة

    ردحذف
  2. عادي ما هي اصلا كتبت مذكرتها علشان تحكي اللي بتشوفه و تحس انه يستاهل يتحكي


    ميرسي على وجودك و تعليقك الجميل
    نورتني كالعادة :)

    ردحذف
  3. واااااااااو بقى أنا منتظرة الباقى بفارغ الصبر على فكرة بقى

    جميلة سردك ده وعاجبنى أسلوبك كالعادة مُميز

    وأنا متأكدة إن مذكراتك هتبقى جميلة جدااااا

    :)))

    ردحذف
    الردود
    1. و انا حنزل الجديد علشان خطرك انتي بس و مش حتاخر :)
      مبسوطة انها عجبتك ويا رب تعجبك كل الحلقات :)

      حذف
  4. حلو اوي المقدمة بالنسبة لفراولة وبالنسبة للانسة [ م] واضح جدا اننا هانقرا اشياء جديدة وافكار جديدة غير معروفة لنا - وواضح ايضا ان الجنون بدأ يسري في العروق والعقل مرة اخري مما ينبأ اننا قادمون علي روائع
    تحياتي لافكارك التي احترمها جدا وتحياتي لقلمك المطيع لكي
    ونحن في الانتظار ولكن لا تتاخري
    كل سنة وانتي طيبة

    ردحذف
    الردود
    1. من ناحية الجنون حدث ولا حرج
      و برضه مش حاجي حاجة جنب ابداعك يا فندم
      مبسوطة ان الفكرة عجبتك يا رب ديما :)
      و مش حتاخر مش تقلق
      شرفني وجودك :)

      حذف
  5. صباح الغاردينيا مينو
    :)
    بجد وحشتيني ووحشتني حواديتك الحلوة
    مستنيه أخبارك قصدي أخبار الآنسة (م)"
    ؛؛
    ؛
    لروحك عبق الغاردينيا
    كانت هنا
    Reemaas

    ردحذف
    الردود
    1. بجد ريماس انتي وحشتيني اكتر الدنيا كانت مضلمة من غيرك
      :)
      تصدقي حنزل الحلقة الجديدة مخصوص علشانك النهاردة

      حذف