الثلاثاء، 14 أغسطس، 2012

كلام في سرك 1-الي الريس مرسي

كلام في سرك
1
الي الريس مرسي
 
 
 



بص يا ريس مرسي هلا هلا على الجد والجد هلا هلا عليه ... انت ليك عندي كلمتين حقولهملك في ودنك كده بسرعة بعيد عن الدوشة في السر كده ويا رب يوصلولك علشان تفهم بالظبط احنا عاوزين ايه
اولا اعرفك بنفسي
انا مصرية ... لا ده مش اسمي ... دي جنسيتي ... واظن ان ده كل اللي انت محتاج تعرفه عني علشان تهتم بكلامي ... مش انت ريس كل المصريين؟؟! اهو انا بقى واحدة من المصريين دول
انا لا مطبلتية ولا مبررتية ... و مش عندي اي نوع من الفوبيا منك او من جماعتك (الاخوان مش المدام يعني) السابقة (او الحالية ميهمنيش اوي)
و مش بخاف من اصحاب الدقون ... ولا بخاف من حد الا اللي خلقني ... وعارفة الحلال من الحرام و مش اي كلام بيخوفني ...  لا معتقل يهم ولا سجن يلم ولا اي حد يقولي حتدخلي النار علشان بتنتقدي فلان بيفرق معايا .... من الاخر انا واحدة مؤمنة مليون في المية ان ما يقبض الروح الا اللي خلقها ... و مقتنعة ان ده قمة الايمان اللي صعب اي حد يوصلها ... و افتكر كده انت عرفت انا مين كويس و عرفت ان اللي حقولهولك حاجة مختلفة عن اللي بيطبلولك و السلام و يقولولك وراك يا ريس عمال على بطال ... و اللي كارهينك لله في لله و يشتموا فيك ليل و نهار بسبب و من غير سبب و اقل حاجة بيقولوها عليك (استبن) (ولو اني بحب الدعابة دي الصراحة و من غير زعل دي كانت اول سقطة ليك بس انت الحمد لله عديت المرحلة دي و فرضت شخصيتك)
المهم جينا للكلمتين المهمين ... بص بقى حط اللي تحطه في الحكومة و شيل اللي تشيله ... العب سياسة او العب لارضاء جميع الاطراف ... او امسك العصاية من النص او من الطرف و انزل بيها على دماغ اللي ميعجبكش او ارميها خالص ... خليك حليم او اغضب براحتك ... كل ده ميهمنيش ... سلطاتك و انت حر فيها تعمل بيها اللي يريحك مادمت مش بتضر اللي يخصني في البلد دي
المهم بقى انا ايه اللي يخصني؟؟!!
اقولك انا بقى ... الناس الغلابة يخصوني و يهموني ... الناس اللي مش لاقية تشتغل ... او بتشتغل يوم و تبطل عشرة ... او بتشتغل و اجرها يدوبك يأكل عيالها عيش حاف ... الناس الجعانة ... اللي مش لاقية تاكل ... او مائدتها الدائمة هي صفائح الزبالة ... الناس اللي مش لاقية حاجة تتاويها غير الشارع ... او مش لاقية حتة تسترها غير العشش الصفيح ... انا يخصني كل محتاج في البلد دي ... كل واحد عايش في مستوى اقل مني و منك و من ناس كتير ... مع انه يستحق على الاقل انه يعيش زينا ... ان مكنش احسن كمان ... و ده اقل واجب على حضرتك ... تفرق كتير لما تاخد قرار تشيل فلان و تحط علان و ده يفرح و ده يشتم و ده مش فارقة معاه و ده مش عارفة يعمل ايه ... و انك تاخد قرارات تاكل الجعان و يدعيلك و يقولك الله ينصرك على من يعاديك ... الناس اللي بتبات في الشارع يا ريس ميعرفوش اسم وزير الدفاع بس يعرفوا شكل رغيف العيش اللي بيحلموا بيه كل ليلة و منى عينهم يكلوه مرة واحدة طازة و نضيف بس مش قادرين...
الدعوة من واحد زي ده يا ريس و هو في الغالب ميعرفكش و لا يعرف اسمك حتى تسوى كتير ... رضا واحد زي ده يا ريس اهم من رضا كل المحللين و النشطاء السياسين ...لان رضا الراجل ده هو اللي حيرضي ربنا سبحانه و تعالى عنك ...و رضا ربنا غالي اوي يا ريس ... دعوة من دول بسنين صيام و صلاة و قيام و ذكر ... صدقني
حاجة اخيرة تخصني ... و تهمني ... الدم اللي لسة منشفش ... اللي لسة شيفينه على ايديهم و في كل الشوارع ... ميروحش ببلاش يا ريس ... متضيعوش و تخلي ام واحد من اللي ماتوا علشان بيحبوا البلد دي تدعي و تقول الله ينتقم منك وهي شيفاك بتكرم اللي امر بقتل ابنها ... صدقني دي مظلومة و دعوتها مجابة و قلبها محروق اوي على ابنها
كلام في سرك  يا ريس ... ارضي دول ... ارضي الغلابة و المظلومين و اصحاب الحق ... حيغلب فيك اصحاب الكرفتات الشيك اللي محليتهمش الا الكلام ومحدش حيقدر عليك ... و حتنتصر على كل اللي ميعجبهمش العجب و لا عزل المشير في رجب ........او حتى رمضان

ليست هناك تعليقات:

إرسال تعليق