الجمعة، 15 نوفمبر 2013

يوميات ثورة في الانعاش



من يوم 25 يناير 2011 وانا بحلم اكتب يوميات الثورة يوم بيوم لاسباب كتير اهمها احساسي ان الايد اللي حتنتصر في الاخر هي اللي حتكتب التاريخ والتاريخ نفسه لازال يصرخ بان كل ايد كسبت كتبته مشوه مزور مليئ بالثغرات اللي مكتشفهاش الا اللي امهلهم القدر انهم يعاصروا الاحداث و يعيشوا لحد ما يقروها مكتوبة او اللي عافر و دور و قرا مية كتاب وكتاب على الحدث نفسه علشان يسد الثغرات و يمسح من دماغه كل الاحداث الاسطورية واللا منطقية ويملاه باحداث حقيقية تعطي للتاريخ الحقيقي معنى وغالبا هؤلاء المثابرين كانوا بيوصلوا لجزء كبير من الحقايق بس عمرهم ما كانوا بيعرفوا كل اللي حصل فعلا
الشئ بقى اللي مكنتش عارفة سببه هو ليه انا منفذتش ده قبل النهاردة؟ 
كل مرة كنت بفكر كان في شئ خفي بيمنعني وبعد حوالي سنة و نص عرفت ان الشئ الخفي ده كان عنده حق لان في حاجات كتير معرفتش اشوفها كويس ساعتها وحاجات كنت مخطئة فيها ناس ظلمتها وناس افتكرت انهم محترمين و طلعوا احقر مما تخيلت بمراحل 
الاحداث دخلت خلاط دماغي واكتشفت ان التاريخ ممكن كمان يظلمنا زي ما بنظلمه و يخلينا نشوف الحقيقة باكتر من تفسير او يمكن احنا امعانا في الجبروت والظلم بقى عندنا القدرة اننا نزور التاريخ وهو بيحصل
ولاني عارفة ومتاكدة ان عمر ما اللي حيكتب التاريخ حيكتبه زي ما حصل والنهاردة و بعد حوالي 3 سنين عرفت اللي منعني واللي خلاني دلوقتي عرفت انه الوقت المناسب للكتابة
الخلاط خلاص بطل يلف والاحداث اللي فاتت خلال السنين التلاتة هديت في نفسي و مبقاش في اللخبطة والافكار والصراع بتاع زمان
مبقاش فاضل الا الاحساس باللي حصل
الحماس .. الخوف... الحزن ... الامل ... الفرحة ... الندم
مبقاش فاضل الا الدموع اللي غسلت جثث لسة دماها مبردش واحنا بنجري وشيفنها بتتجر ناحية الزبالة لاننا لو وقفنا لحظة حنترمي جنبها
مبقاش فاضل الا مرارة لما اتخدعنا
مبقاش فاضل الا غضب لما شوفنا الكدب بجح لدرجة انه وقف يقسم اننا كدابين بعزة جلال الله
مبقاش فاضل صراع مين الصح ومين الغلط
بقي قاضل بس بقايا قضية بتتوه في الزحمة 
ولاننا من البداية كنا اصحاب القضية ولاننا دلوقتي بقينا اكتر ناس متاكدين ان القضية خلاص تاهت بين كل الناس و محدش من الناس اللي بيتخنقوا على كل الفضائيات و في كل الشوارع متمسكين باهداف الثورة الاصلية و كانهم جميعا بينهم اتفاق غير معلن على افشال كل اللي عملناه
كانهم جميعا عاوزين يختصروا كل احلامنا و طموحتنا في شخصية مجرد اقصائها من الساحة بقى هو كل معاني الثورة بالنسبالهم
ولان مفيش ثورة بتقوم علشان شخص او ضد شخص وانما بتقوم ضد كل الظلم اللي بيمثله نظام او شخص ولان الظلم مش بيختفي باختفاء الانظمة او الاشخاص اللي بترعاه وانما بيختفي بس بتأسيس قواعد للحق 
وعلشان نفتكر كلنا الحق اللي كنا عاوزينه و راح مننا 
اسمحولي اكتبلكم اللي حصل واللي بيحصل من وجهة نظر اكثر حيادية مما كنت عليه 
بعد ان ذهب عني الزبد ولم يبقى في ارضي الا ما قد ينفع الناس
و لكم مطلق الحرية بانكم تقبلوه او ترفضه
المهم بس لو تدوا نفسكم خمس دقايق بس تسمعوه
وخمس دقايق زيادة تفكروا فيه
ادوله فرصة
يمكن يمس جواكم حقيقية مكنتوش واخدين بالكم منها 
او عارفينها بس مكنتوش متاكدين
يمكن كنتم فاكرين انكم بس اللي شايفين اللي انا شوفته
يمكن لو لاقيتم حد شاف اللي شوفتوه و حس اللي حستوه يبقى عندكم لسة في امل
ننقذ اخر انفاس الثورة
يمكن نقدر نخرجها من غرفة الانعاش
بعد ما دخلناها هناك بايدينا
اخر وعد اوعدهلكم اني لا حكون رغاية و لا مبلتية ولا حخون حد ولا حقديكم رايي ولو اني حقولكم كل شئ من منظوري الخاص لاني للاسف مقدرش احكيه من منظور غيري في وقت مبقاش ممكن تثق في غيرك ده مهما كان مين
انا حبدأ الكلام واللي حابب يسمع يتفضل واللي عاوز يزود اهلا وسهلا واللي معترض اهلا وسهلا واللي حابب يفكرني باي شئ نسيته اهلا و سهلا لكن انا مسئولة فقط عن ما اقوله عن نفسي امام الله و امام الجميع
و كعادتي دائما اختم كلامي ب ...

ربنا يستر :) 



#ملحوظة : بجانب اليوميات سانشر بعض بعض المقالات القصيرة تحت اسم #خطوات_ثورة
و دي بعكس اليوميات مش مرتبة باي ترتيب تاريخي وانما هي احداث متفرقة من قبل 25 يناير 2011 ولكنها مرتبطة بشكل ما بالثورة كما ستلاحظون فارجوا من الناس اللي عندها مزاج تتابع اللي حقوله يقروها لو ممكن



الخميس، 14 نوفمبر 2013

الغبار المتراكم


بياااااااااااااااااااااااااااااااااااااااانه هام

بعد ان تراكم غبار النسيان على مدونتي الصغيرة والجميلة وبعد ان اقترب موعد احتفالي بعيد مولدها (هو لسة فاضل 3 شهور بس اعتبروه قرب) قررت ان انفض الغبار عن صغيرتي واعيد استغلالها في نشر افكاري واحلامي و حكاياتي (ضحكات متقطعة شريرة) 
و ما ان واتتني فكرة جديدة و اظنها مهمة (على الاقل بالنسبالي) فلقد وجدت ان شريكيتي الفكرية و صاحبتي لمدة سنتين واول من استئمنته على افكاري و كلماتي هي احق ان تكون منبر بث تلك الفكرة الجديدة (دانا عليا جمل)
لذا فانتظرونا معا بعد قليل (مش قليل اوي يعني) لنعاود البث المباشر واحدى حملاتي انا فراولة الفكرية (داحنا حناكل ضرب)
وكعادتي دائما ....
ربنا يستر :)


و الله الموفق والمستعان

كان معكم من بيتنا : منة بنت سيد

الاثنين، 1 يوليو 2013

ريسنا



ريسنا ملتحي ...لكن لا يستحي
ألا تكبرون
ريسنا بيصلي ...لكن بيهد ولا يعلي
الا تهللون
قطع الكهربا ...وقعد على المصطبة
وعصرنا عليه ليمون
ريسنا حيحمي بيتنا ...و يقسمنا بفيتنا
اخوان و معارضون
ريسنا قال مؤامرة... شرقية معادي غمرة
بسبب فودة وعاشور
ريسنا له عشيرة ... اهل و اصحاب و جيرة
خريجين سجون
ريسنا آلف وزارة ...من عشيرته الجبارة
الا له تشكرون
و زي ما قال الريس
قنديل وزارتنا كويس

الخميس، 6 يونيو 2013

الي الماضي



اليك ايها الماضي

اليك يا بطل كل الكلمات

يا احبار كل الصفحات

يا سواد الألم

و حمرة الحب

و زرقة البحر والسماء الذين كانا شهود لقاءانا الاخير والوداع الغير معلن

اليك يا سيدي اكتب و ارسل خطاباتي اليتيمة التي تفتقد المرسل اليه

بعد التحية والسلام

بعد الظلم ..الفراق ...الخصام

بعد الرحيل

بعد الفقدان

بعد ان اغلق الحب كل الابواب

ارسل اليك اخر اخباري

ارسلها وانا لازلت احلم بك ا تسترق السمع على ابوابي

احلم بك تقف خلف كل الاشجار لتلمحني اعبر ولو لمرة عبر بوابات ماضينا السحيق

لتتأكد اني لازلت هنا

لازلت احيا

لازلت اقاوم شهوة الذاكرة

لازلت اقاتل حبك

سيدي

يا بطل حكاياتي الاولي والاخيرة

يا ساكن كل السطور

اُعلِمك باني لازلت اكافح ...كي لا افتقدك ... اعلمك اني لم اتحسن كثيرا في ذلك

اُعلِمك اني اجاهد الا احبك

اُعلِمك بفشل كل المحاولات

حبيبي ...تلك الكلمة التي عانيت لامسحها من بين كل السطور او ان اسرقها من ماضينا لاهديها لغيرك

ولكني فشلت

فانت رجل خُلق ليمتلك الكلمات ولا يعيدها

ولن يستطيع رجلا ان يحتل كلماتك بعدك

اُعلِمك اني اتذكر

كل ما كان بيننا

كل اللحظات .. كل البسمات ... كل التضحيات

كل الدموع

سامحتك الدموع ولم تسامحني ... تتذكر لك الخير و تؤنبني على الاخطاء

يرسل لك الحب تحياته ... يقول انه لم يقابل غيرك استطاع ان يعلمني الا انسى

و لكن قلبي يعاتبك ... كيف لم تترك له اي مفر للنسيان

كيف تملكته

اما انا فلا ارسل لك سوى حبي

لم اكن املك ولن املك غيره لاهديك اياه

وما استطاع احد ان ينتزع منك حق الحصول على كل الحب بقلبي

ولتعلم اني لازلت اتمنى ان استمع الي صوتك

اعلم اخبارك

ابعث لك بكل خطاباتي

ولكنك قبل ان ترحل

رفضت ان تترك العنوان

لذا فانا ابعث رسائلي الي زجاجات البحار التي تطوف العالم بحثا عنك

علك تجدها

وتجدني لازلت مقيدة بصحبة ماضيك انتظر ان اراك لاخر مرة ... قبل الرحيل

و السلام والحب هو ختامي

والوفاء وعدي الوحيد



الاثنين، 8 أبريل 2013

اثر عطري




مررت بنفس المكان ... لكني اليوم اصبحت وحيدة ... لم يعد موجودا ليشير الي المياه المتلألئة تحت ضوء الشمس و يقول ان قلبي صافي مثلها .
لم ادرك حينها كم كانت تلك المياه ملوثة و كم كانت تشبه قلبه هو لا قلبي انا ... ادرت ظهري للطريق و للذكرة و مضيت لا اترك خلفي سوى ابتسامة متألمة و اثر لعطري.

الأحد، 7 أبريل 2013

اسطورة حبك الاخير



عندما تفكر في حب غير منطقي
فانت تهرب من حب حقيقي كان 
********************


فكرت ان انساك
ان اهرب من قلبي الي احدى القلوب التي تحيط بي
فكرت ان اهرب من كياني 
فكرت ان اهرب حتى من مبادئي
فلأداوي جراحي بالذي كان هو الداء
فلانسى الحب بالحب
فلارحل مع احدهم
لاتزوجه
واحيا من جديد وانجب طفلا يحمل ملامح اقرب لك من زوجي
او هكذا اراه انا
اعطيه اسمك وانظر اليك واتخيل ماذا كان سيكون شكل حياتي معاك
فلاهرب وارحل واملك حياة جديدة بين ناس جدد
لاصبح سعيدة
ترى هل هذا فعلا هو الحل
هل سيكون للحياة طعم بعد ان ترحل للابد
هل يمكنني ان اتحمل هذا الرجل 
هل يمكنني ان اكون سبب شقائه بعد ان يتزوج امرأة لن تحبه
هل اخون ابو ولدي الصغير في كل لحظة بقلبي و بمشاعري و بداخل افكاري
هل اكذب على ولدي يوم ما لاقول له اني احب ابوه
ام اني ساصدمه في امه عندما احكي له عن رجل كان يحمل اسمه و يملك قلبي
لست انا هذه المرأة الكاذبة الخائنة 
لا اؤمن ان الجرح العظيم يداويه حب عظيم انما لا يداويه الا جرح اعظم لذا فالافضل ان تبقى انت جرحي الابدي
لن يحمل طفلي ملامح رجل غيرك لاني لن اوافق على ان انجبه من رجل غيرك
فلا ضير الا يولد ابني ابدا
لقد حاولت
لكني اكتشفت ان قلبي لن يدق بعد الآن
لم تعد المشكلة اني لا اجد الحب
ولكني اعلم الآن اني لم اعد استطيع ان احب مرة اخرى
لقد هدم الكثيرون اسطورة الحب الاول
ولكني يبدو واني ساكتب بحروف من آلم اسطورة حبك الاخير

السبت، 6 أبريل 2013

ابتسم ! !... فقط



بعد ان انهيت كلامي ظللت انظر اليه في صمت
ابتسم في رقة وقال : 
بتحبيني؟ عارفة كام واحدة حبيتني وشايفة وصلوني لايه؟
نظرت له في رجاء قائلة : 
طب انت حبيتهم كلهم وطلعوا عينك... متجرب تحبيني انا كمان... مش يمكن اديك عينيا
ابتسم مرة اخرى و صمت ... ولم اعلم ابدا معنى ابتسامته تلك

الأربعاء، 27 فبراير 2013

ابجدية الفقدان




( أ )

افتقد "الامل" و "الأمان" ؟؟!! لا "اندهش" من هذه النتيجة ابدا .... اعلمها مسبقا... و اعلم تبعاتها ... فقد خلقت منذ سنون عدة انا فقط الوحيدة فكيف تآمن بالوحدة او تأمل بالخلاص من عذاباتها .... كيف تملك سوى "الاستسلام"


( ب )

"بلادي" .....اوطاني .... مدني..... تلك التي كانت تحيا بقلبي و تحيني .... لا تلك التي احيا بها
"بدائية" الانسانية الرحيمة بدون تلك "البهارج" الكاذبة التي تحف "بلاد" تخون باسم الحق


( ج )

"الجنة"
افتقد "جوادي" "الجامح" بين مروج الاحلام القديمة
"جنة" "الجوري" المتفتحة .... المبهجة للقلب .... التي صارت هي تفتقد الحياة نفسها
نبتت في القلب الذي اصابه العجز غصة فصار يجافي الاحلام و الازهار و لا يشعر بفرحة او "جمال"


( د )

"دوائي" و "دائي" الصمت المطبق الذي يدغدغ الروح ويفتتها و يبعثر اشلائها 
"داء" صمتي بعد ان استبد بي الآلم ولم يعد البوح  شفاء 
"دوائي" صمتي علّي انسى او اتناسى الالم
ولكن يبقى اخر الامل "دعاء"


( هـ )

"الهواء" النقي .... "الهوى" الباقي .... اضغاث احلام
"فالهواء" لوثته الاكاذيب
و "الهوى" يعشق مواسم الرحيل ...يتركنا على شفا "هاوية"صنعها "هو" ... علق بالقرب منها يافطة مكتوبة بخط مغري... مخادع.... مليئ بالامنيات....جنة "الهائمين"



( و )


" وجعي" الايام التي تمر فلا هي تحمل البهجة لقلب اصابه "الوهن" و لا هي تتوقف و تنهي عذاباتي و خيباتي المتتالية التي اجابهها "وحدي" ..... لم اعد اذكر الصدمات.... فلم يعد هناك شئ يصدمني ... فلازالت الدنيا تتفن في اعدة الاحداث المؤلمة فقط مع " الوقت"


( ز )

"زوابع" الالم التي تعتصر القلب كل مرة يرنو الي الحب... الحياة... الامل... او حتى راحة الموت 
فينتهي ككل سوابقه ... بفقدان كل شئ....
الا الفقدان !!!

الثلاثاء، 26 فبراير 2013

عيش




عيش الحياة للمنتهى
حب اخر حاجة
احلم لاخر مدى
اعشق حد الجنون
افرح لما تقتل الضحكة من التعب
ابكي لما تشتكي منك الدموع
اجري لما قلبك يقف من الدق
فكر اكتب اقرا العب نط لما تلمس السما
عد النجوم 
ارسم كل الاقمار
و اتحدى نار كل الشموس
امشي فوق كل البحار
ارقص تحت المطر لما تكسر رجليك من كتر الرقص 
ضحك كل البشر عليك
صاحب كل الناس
سامح كل الخاينين
احضن كل الاطفال
بص في عيون حبيبك طول الوقت
عييييييييييييييييييييش 
لانك ببساطة متعرفش امتى حتتحرم من انك تعمل كل ده

الأحد، 24 فبراير 2013

فيروزيات - بعدك على بالي





طل وسالني اذا نيسان دق الباب 
خبيت وجي وطار البيت فيي وغاب
حبيت افتحلو 
عالحب اشرحلو 
طليت مالقيت 
غير الورد عند الباب 

بعدك على بالي .......

نظن انه الرحيل ...الفراق الابدي ...و لكن تبقى دائما الذكرى... 
لازلت اذكرك ...لازلت حاضرا بروحك و كيانك الجاثم فوق الذكريات التي تحتل كل ذراتي ...
لازالت لمساتك الحانية تلهب جسدي باثارها رغم مرور الزمن منذ اختفت ... 
يقولون ان الجروح تندمل و تختفي لكنهم لم يعرفوك او يعرفوني ليعلموا انك جرحي الدائم ...المؤلم ابد الدهر

ياقمر الحلوين ....

لم اكن لاصنفك جميلا يوما ما ... فوصف الجمال يجرح كبريائك الرجولي و يكسبك صفات انثاوية تترفع انت عنها ولا اقبلها انا لك وصفاً 
فلطالما ذكرتك رجلاً او هكذا ظننت ... ولكنك كنت مبهر ...مضيئ... ساحر.
لا ...كل تلك الصفات قد تبخسك حقك  او تقلل من اثرك الواقع في نفسي والذي يحتلني حتى الآن

يازهر التشرين .....

يا باقة الاحلام والافراح والاحزان والآلام والموت
يا عالم كل الالوان
يا زهرة تفتحت بلون القلوب البيضاء التي يمسها سحرك فتذوب و تؤرقها صفرة الغيرة الجنونية وحمرة العشغ الدامي حين تحصل على صك ملكية زائف لقلبك و توضع فو قبري وهي متشحة بالسواد
يا باقتي وبستاني الذي روتهم الدموع و الدماء فكان طرحهم هو الموت المؤلم والبطيئ
يا اعشاب الكذب الضارة
يا يرقات الخيانة القاتلة
ويا كل ثمار العشق المجنون
لازلت لا اصدق رحيلك

يا دهب الغالي .....

لطالما ظننتك الاغلى والابقى والاقرب للقلب
كنزي الذي لم تمهلني الدنيا ان احتفظ به واتفقد لؤلؤاته و احجاره الثمينة 
عقودي واساوري و خواتمي التي انثرها فوق جسدي حتى تحتويني 
زينتي التي تبقيني دوما الاجمل
و لكن بعد مرور الوقت ... بعد ان يستبد بنا الفراق والآلم ..
تاتي اسئلة الشكوك ..متباطئة ... مستفسرة ...اذا كنت حقا لا اعلم انك الكنز الزائف ؟؟!!
الذهب الذي يعمي بريقه الابصار لكنه ما يلبث ان يخبو البريق للابد...فلا نجدنا  عشقنا وتزينا الا ببعض الصفيح الرخيص

بعدك على بالي 
ياحلو يا مغرور 
ياحبق ومنتور 
على سطح العالي

السبت، 23 فبراير 2013

طب اراهنكم




سهل الكلام جدا بس الفعل مفيش
طب اراهنكم تقعدوا سنين تقولوا قلبنا مقفول و مش حنحب
ومع اول نظرة لشخص معين تلاقي قلبك مش مكانه
تحس كانك كنت ماشي في حالك و حد نشلك و يا ريته خد قلبك و سابك في حالك
ده عامل زي اللي في ايده مغناطيس بيشد بيه قلبك نحيته و يفضل يا عيني القلب يتنطط وهو محبوس جوة صدرك لا هو عارف ينط يروح يقوله على اللي جواه ولا هو عارف يفضل في مكانه ساكت و هادي زي ما كان
حتحس انت كمان ان الدنيا ضيقة اوي مش سايعاك تعيش فيها انت واحساسك بيه و في نفس الوقت حتحسها واسعة جدا و كبيرة اوي لما تحسب المسافات اللي بينك و بينه حتى وهو قصاد عينك

اراهنكم لو قولتم حتى لو قابلنا الحب حنلف و نمشي من الناحية التانية
بس اول ما تسمع صوت حد معين تلاقيه بيحتل روحك و يتغلغل جواك كانه بيجري ويا دمك وبيكتفك ويخليك تمشي وراه زي المسحور
و يا ريته بيديك فرصة صوتك انت تطلع تقوله على اللي عمله فيك لا ده بيفضل ساحرك بكلامه اللي مش بيكفيك ولا بيروي قلبك العطشان ليه و بيكتف لسانك اللي مبيقدرش ينطق بحرف واحد من اللي نفسك تقولهوله
ساعتها حتتنفس حبه اللي حيبقى اوكسجينك بعد ما تكتشف ان الهوا اللي كنت بتتنفسه مفيهوش اوكسجين حقيقي وانك حتبدا تتخطف من الدنيا اللي مكنتش عايش فيها اصلا علشان تعرف يعني  ايه حياة بجد
اراهنكم ان الحب اقوى منكم كلكم وامكر منكم كلكم وان كان للكره مدخل في عقلك فكل مداخل قلبك و مشاعرك و ووجدانك وروحك مفتوحة على اخرها للحب و بس, ومهما حاولت تقفل فيها وتوهم نفسك انك تقدر تطرده من حياتك مش حتقدر
للاسف هو الاقوى و الابقى لانه الاصل في حياتك
للاسف لو زارك في يوم بجد عمرك ما حتقدر تهرب
والحاجة الوحيدة اللي ممكن تعملها في الوقت ده انك تصلي لربك وتدعيله يكون اللي ملك مفتيح حياتك في اللحظة دي يقدر يحس باللي جواك 
لان الحب اللي من النوع ده لو ملكك بجد و محدش حس بيك حيستفرد بيك احساسك
ومش بعيد يخلص عليك
لكن لو ربنا رزقك باللي يحس بيك بجد ويقدر حبك ده 
حتبقى الجنة على الارض

الجمعة، 22 فبراير 2013

مدمنة





احذري من ذاك الوجه الذي يخترق الاعماق و يسبر غورها
احذري من التامل فيه فهو يخترق كل دفاعاتك
لا تدمني تلك الملامح والقسمات 
احذري من الكيان الذي يحتلك 
ايتها الانثى الحذرة
الكلمات لن تدفعك للجنون والاثم 
ولكن التطلع لعيناه سيفعلون حتما
احذري
حتى لا تصابي بذاك المرض اللعين
انه التعود
ان يظل هنا 
ان تظلي تنظري اليه
وان يبقى 
كما هو
يسكنك
و يحتل اعماقك للابد

لاننا غيرهم




لا يصدقوننا فقط لاننا لسنا مثلهم و لا نضع فوق وجوهنا اي قناع
لا يصدقونا فقط لاننا نتحدث بصدق و نحب بمشاعر حقيقية
لاننا لازلنا بالرغم من السنوات نملك براءة الماضي
 لانهم لا يصدقون وجود بعض الانقياء الاتقياء
لا يصدقون الا بالملوثين امثالهم
لذا فنحن في عصر ائتمان الخائنين
و اصبحنا نحن المنبوذين والكاذبين
الا لعنة على الخونة
وليرحمكم الله ايتها الاقلية من بني الانسان

هو




هو يعرفه الجميع. هو تعجبه تلك النظرات المتفحصة من عيون المراهقات اللاتي يمرّن به وهم يتخيلونه فتى احلامهن. حقد رجال يتمنون فقط لو يحصلون على جزء صغير من الاعجاب الذي يناله هذا الوغد. حصرة النسوة اللاتي لم يظفروا ابدا بشريك مثله. فقط عندما مرّت هي اختفت كل النظرات. لم يبقى سواها . هي التي كان يصنفها انثى حقيقية بين كل الكائنات اللاتي لم يملكن يوماً من الانوثة سوى لقب ببطاقاتهن. مرت و كأنه غير موجود بهذا العالم. التفت يتابعها بنظره حتى اختفت وراء ذلك المنعطف بكل كبرياء. استدار يكمل طريقه منكس الراس غير أبه بكل النظرات التي لم تتوقف لحظة عن ملاحقته.

الاثنين، 18 فبراير 2013

عادوا بالذكرى




الا لعنة الله على الماضي الخرب :(
الا لعنة الله على الذكريات الحزينة  :(
الا لعنة الله على آلام القلب :(
الا لعنة الله على من يظهروا ليحملوا كل ذلك في طلتهم  المفجعة

السبت، 16 فبراير 2013

تناقضات عبثية



بالرغم من ان مر حوالي اسبوع على كتابتي للمقال ده وانه المفروض مكنش يتنشر هنا بس حصلت ظروف منعت نشره بس انا بنشره هنا النهاردة لسبب ما في نفسي




يبدو ان جماعة الاخوان والرئيس مرسي لن يتوقفوا عن القيام بالدور العبثي المتناقض الذي اثروا لعبه منذ بداية الثورة المصرية و حتى هذه اللحظة فلم نكون قد انتهينا بعد من تناقض تصريحات اعضاء الجماعة و حزب الحرية والعدالة و رئيس الجمهورية ورئيس الوزراء و القرارات التي لا تلبث ان تلغيها قرارات اخرى مناقضة لها في اقل من 24 ساعة و التصريحات التي تنفى بعدها بساعات حتى فوجئنا بتناقض جديد على مستوى احدى اهم القضاية الدولية الخطيرة . 
ففي الوقت الذي يدعي فيه اعضاء الجماعة ورئيس الجمهورية الساسة من التيار الاسلامي دعمهم الكامل والمطلق للقضية السورية والثوار في سوريا  و التنديد بما يتعرض له الشعب السوري من جرائم بشعة يندي لها الجبين الدولي وفي الوقت الذي كان المصريين فيه يدينون الموقف العربي والدولي المتخاذل تجاه القضية وجدنا مؤسسة الرئاسة وعلى راسها الرئيس مرسي يسرفون في مظاهر استقبال الرئيس الايراني محمود نجاد احدى اهم الداعمين لنظام بشار الاسد الدموي و المناهضين للثورة السورية و الذي كان قد حضر لمصر  للمشاركة في مؤتمر قمة دول التعاون الإسلامي و هذه الزيارة هي الاولى لرئيس ايراني منذ عام 1979 بعد التوتر الشديد الذي اصاب العلاقات بين البلدين عقب توقيع اتفاقية كامب ديفيد و موافقة الرئيس السادات على اسقبال شاه ايران في مصر بعد قيام الثورة الاسلامية بها.
الملفت للانتباه ان جماعة الاخوان المسلمين المنتمين اللي الطائفة السنية والتي تتذوق في المذابح السورية كل الويلات على يد حزب البعث الشيعي بقيادة بشار الاسد قد رحبت بهذه الزيارة وهذا الترحيب المفرط من جانب الرئيس والمؤسسة الرئاسية للرئيس الايراني في حين عبر الشعب المصري عن استياءه و غضبه الشديد من دعوة الرئيس الايراني لحضور القمة الاسلامية والترحاب الشديد الذي وجهه له الرئيس المصري بشكل خاص و عدم الالتفات الي ادانة دولة ايران في المآساة السورية و قد بات الغضب الشعبي واضحا في صفحات الفضاء الاثيري التي امتلأت بمهاجمات للموقف المصري من الرئيس الايراني كما لاقي موكب نجاد انتهاكات من الشعب المصري من ركلات و هتافات عدائية توضح الموقف المصري الحقيقي منه و انهم براء من تصرفات مؤسسة الرئاسة المتناقضة

الجمعة، 15 فبراير 2013

بلطجية وليا الشرف




خالد سعيد
سيد بلال
عماد عفت
جيكا
محمد الجندي
عفوا 
انتم بلطجية
الحكومة بتقول كده
والناس بتقول ايه وداكم هناك
سالي زهران
مصطفى الصاوي
علاء عبد الهادي
انس 
كريم خزام
انتم كمان بلطجية
و برضه الناس مش عارفة ايه وداكم هناك
انتم مش شهدا ولا موتكم كان غدر 
لا انتم بلطجية اللي اجركم الحلم و دفعلكم الاجر جنة وعنيكم زغللها بريق الامل ومشيتم و سيبتونا
انطفى الامل في عنيكم اللي انطفت
بدل ما تسلمولنا راية امل واخلاص و حب و رسالة عاوزين نكملها 
سلمتولنا ياس مرارة و خوف 
وخدتوا معاكم النور لما ضلمت  مصابيح المستقبل في عنيكم
انتم بلطجية الحب 
و انا دلوقتي حرمية و بتاجر بدمكم على فكرة
انا عندي مصلحة شخصية وعاوزة احققها 
نفسي في بلد نضيفة  واهلها بني آدمين بجد و دي مطالب فئوية بالمناسبة
نفسي اللي حرمنا منكم تتقطع ايديه ورجليه ويتعلق على مشنقة زي ما ربنا قال بس ده عنترية فاضية و مبالغة على الفاضي
نفسي الناس تعرف الكداب بجدو يعرفوه مقامه بدل ما يصدقوه علشان  بس مكسلين يفكروا بس برضه دي احلام طفولية
نفسي انام من غير ما اخاف نفسي اصغر من في البلد دي يعيش زي اكبر من فيها
نفسي الغلابة يتعالجوا صح و يتعلموا صح و ياكلوا نضيف من غير ما حد يذلهم باللقمة اللي هي بفلوسهم اصلا 
نفسي  يعيشوا يحسوا انهم يستاهلوا يتعاملوا كبني آدمين مش يفتكروا ان دهعطف الكبار عليهم ويحمدوهم على العيش اللي مش عايشينها اصلا
بس باين ده كله نصب و برضه  فئوية وبلطجة
زي ما انتم  طالبتم بكل ده و بقيتوا في الاخر بلطجية او ارقام في دفتر الثورة اللي مكملتش كلامي كمان ده كله ما هو الا كلام بيتكتب بالقلم الرصاص على هامش كتاب نفس الثورة ولازم ابوس ايدي وش و ضهر واحمد ربنا اوي انهم سامحينلي اقوله قبل ما يتشطب عليه وعليا من كل السجلات و كاننا مكناش ولا حنكون الا في حلم مات اصلا قبل ما نلحق حتى نحلمه
بس برضه مهما كنتم اتمنى ابقى منكم
حتى بلطجية 
و ليا الشرف

عيد ميلاد حزين




مر اليوم ليذكرها بتاريخ غير مشابه... يوم رفضت ان يحتفل بعيد مولده وحيداً بعد سفر عائلته... لن تعطيه مكالماتهم الهاتفية كل الوان العيد... و لكن هي بالتاكيد ستفعل ...
اليوم هو عيد مولدها هي, تحتفل به وسط خراب تركه رحيله للابد. وحدة زينتها ذكرى قاتلة له قبل الذهاب بلا عودة... استبدلت اغاني عيد الميلاد بكلماته التي تتردد بين جنبات القلب و يشهد الكون على صداها... عندما قال: لم ادرك معك ابداً يوم واحد من السعادة... هكذا قال وداعاً يومها و هكذا تمنى لها اليوم عيد سعيد بتلك الذكرى.

الخميس، 14 فبراير 2013

مذكرات فراولة VS يوميات كاتبة فاشلة جدا (4)


الحلقة الرابعة

فالنتين بطعم النكد

14-2-2013



صحيت الصبحية كالعادة غيرت هدومي ولبست الجاكيت الاسود الطويل على البنطلون الجينز الازرق والبلوزة البيضة و البوت الاسود الطويل ولفت الطرحة كالعادة ونزلت روحت الشغل 
بس لفت انتباهي حاجة غريبة
انا كنت الحاجة السودة الوحيدة اللي ماشية في الشارع 
اه والله ما بهزر انا كنت حاسة اني نقطة سودة في بحر احمر 
قعدت اتلفت حوليا وكالعادة بتسال هو في ايه؟ هو النهاردة ماتش الاهلي ولا ايه؟ بس و انا رايحة الشغل في طريقي مريت على محل انا متاكدة ان صاحبه زمالكاوي لاقيت برضه خير اللهم اجعله خير المحل لونه اتغير وبقى احمر في احمر قولت يمكن الراجل اتلخبط وكان يقصد يلونه بمبي زي لون اليونيفورم الجديد بتاع الزمالك (لهذا حديث اخر في وقت اخر) بس مظنش ده احمر احمر مش بمبي خالص
و كمان ده راسم على باب المحل قلوب!!!
قلوب؟
افتكرت حاجة وطلعت الموبيل بتاعي علشان اتاكد منها واللي حسبته لاقيته
النهاردة يوم 14 فبراير وانا ناسية خالص 
الفالنتين داي (في رواية اخرى عيد الحب)
يا سلااااااااااااااااااااااااام النهاردة العيد اللطيف الظريف ده اللي انا عمري ما اتنيلت على عيني و احتفلت بيه خالص
اد ايه الواحد كان نفسه يتخطب او يتجوز بس علشان يعدي عليه الفلانتين وهو معاه شريك ينسى يقولي كل سنة وانتي طيبة في اليوم ده و لا ميجيبش دية وتكون النتيجة اني انكد عليه و اطلع عينه عقابا ليه على عدم تذكر هذا الحدث المهم (مع انه لو جابلي حاجة حزعل لان فرصة النكد راحت عليا- طيبة طيبة يعني)
المهم بقى روحت الشغل وانا في دماغي تلك الافكار الجميلة الحالمة وانا بقول امتى يجي اليوم ده بقى
ومن حظي ال................ ما علينا قابلتلكم الانسة (م) اللي حتكون سبب في موتي باكسفكسيا الغيظ ولاقيتها كاتبة حاجة جديدة عن الفلانتين وامري لله اضطريت انشرها علشان بس انا لازم التزم بالوعد بتاعي واسفة اني مضطرة اعمل فيكم كده و اخليكم تقروا هي كاتبة ايه
سامحني يا رب :(



اشعار في الحب و كده

14-2-2013



بصوا انا كنت قررت ابطل اكتب شعر
والله كنت ملتزمة بالقرار ده بس مقدرتش امنع الالهام بقى
و اوعدكم المرة دي احسن من المرة اللي فاتت
وكمان مش حاجة كبيرة دي صغننة و حلوة
اه والنيعمة
اسمعوا كده و قولولي رايكم

دبدوبي

حبوبي حبوبي 
جابلي دبدوبي
لونه احمر وردي
و حلفني و مسك يدي
ابقى اسميه دوبي
حبوبي حبوبي
اداني دوبي
ملفوف بشرايط
بس قماشه شايط
من لمسة بيدوبي
محبوبي محبوبي
رجعتله دبدوبي
جايبلي هدية بالية
واجيبله الحاجة غالية
وانفضله جيوبي


ها ايه رايكم يا جماعة؟ حلوة؟

مذكرات فراولة VS يوميات كاتبة فاشلة جدا (3)

الحلقة الثالثة
يا مرارتي يانا

12-2-2013


السلام عليكم
بصوا انا عارفة اني بقالي كتير مكتبتش مذكراتي و محكتلكوش عن اللي بيحصلي بس هي السبب
الله يعمل فيها كل اللي نفسي فيه
(م)
هي سبب جناني ووجع قلبي بقالها مدة نفسها انشرلها اعمالها قولتلي طب اكتبي حاجة و تعالي انشرهالك غابت شهور و رجعت جايبة :(
انا مش ححكم انا حسيبكم انتم اللي تحكموا بقى :(
اتفضلوا اتفرجوا بقى



الحلقة الثالثة
قليل من الشعر.... كثير من شد الشعر

12-2-2013


و الآن احب ان اقدم لكم اول تجاربي في كتابة ااشعار:

جاردينيا

صباحك لون الجاردينيا
وليلك طعم الشيكولاتة
حبيبي يا قلب يا دنيا
يا خفة دم الشرباتا
خلصت فيك  الحلويات
بس انت احلى يا حبيبي
من قلبي ليك كل الدعوات
فرحانة ان انت نصيبي
سعيدة ان انا ديما وياك
مبعدش عنك ولا ثانية
حياتي متتعش الا معاك
يا اجمل من اجمل دنيا


و دي كانت اخر محاولاتي لكتابة الشعر و مظنش اني حفكر اكررها تاني . السبب؟؟!
اصلا انا لما وريتها لصديقتي و هي طلبت مني اقف القيها على كل اصحابنا و هم يحكموا مزعلتش اوي ان هدومي اتدلق عليها كمية عصير و بيبسي محصلتش قبل كده في التاريخ . اصلا البلوزة مكنتش جديدة و مزعلتش انها باظت
بس فرق معايا اوي ان محدش من اصحابي عاوز يرد على التليفون لحد دلوقتي و لازلت في محاولات لاستعادتهم مرة اخرى . ولحد ما احل المشكلة دي انتظروا افكر في حاجة جديدة اكتب فيها.

الاثنين، 11 فبراير 2013

من ذكريات 25 يناير اللي فات




"الحرية والعدالة" يشارك "جماعة الاخوان" في احياء ذكرى يناير

ده كان احدى عناوين الصحف خلال الفترة السابقة لذكرى ثورة يناير
بغض النظر عن موقف جماعة الاخوان من ثورة 25 يناير اللي رفضوا المشاركة فيها حتى بداية الاعتصام يوم 28 يناير (جمعة الغضب).
و بغض النظر عن تصريحات الاخ "المرسي" المتحدث الاعلامي لحزب الحرية والعدالة و اللي افادت ان "الجماعة" هي القوة الوحيدة اللي شاركت في الثورة!!!!
و بعيداً عن الاسلوب الذي ستتبعه الجماعة في الاحتفال بالثورة (توفير منتجات بسعر الجملة و اراهن انها تكون زيت و سكر –تقريبا كده ده حيكون احتفال بالنتائج الانتخابية خلال السنة اللي فاتت مش بالثورة نفسها-)
انا بقى في كل ده موقفنيش غير حاجة واحدة بس.
ان من صرح بمشاركة الحزب للجماعة هو د.محمد سعد الكتاتني (رئيس الهيئة العليا للحزب ) و عضو بجماعة الاخوان المسلمين
يعني حزب الحرية و العدالة (الجناح السياسي لجماعة الاخوان) وافق بقرار احد اعضاء الحزب و الجماعة
على مشاركة (الجماعة) باحتفال بثورة مكنتش الجماعة موافقة عليها من الاول اصلا.
وهنا يحضرني مقولة الفنان الجميل "سعيد صالح" :
" لا ما انا كنت معايا!!!!"

السبت، 9 فبراير 2013

بلا رجل







لا تختصروني وتختذلوني في صورة امراة مصيرها الزواج ولا اكثر
انا انثى ان لم احمل يوما طفل فانا احمل فكر قد يبدل تاريخ الارض
انا انسان لا يفشل لمجرد انه خلق بلا شريك
انا احمل حضارة انسانية متمردة
لا تنتهى عند اعتاب باب الرجال
وانما تمتد الي ما خلف البحار والجبال
انا حضارة الاجيال قادمة
انا تاريخ الامة البعيد
لا تقف امامي ويكون دعائك الوحيد ان يكون لي رجل
فانا احيا بلا رجل
انا احيا قبل هذا الرجل
وسوف احيا بعد هذا الرجل
انا ابقى رغم الفراق
انا ابقى من الفراق
انا الحياة تتوهج فوق رؤوس الاحياء
تاج النجاح ينير الطريق
انا الثقافة , الحضارة, العلم, الحب ,الحياة, والموت
مني تبدأ الرحلة والي تعود
انا امرأة بدونكم او بكم
و لسوف اكون دائما انا بلا نقصان
حتى بلا رجل
فلا تحكمون حولي عقدكم الذكورية فتروني دائماً وحيدة بدونكم
لقدسئمت العابكم السخيفة و غروركم الساذج
الا ترون اني لا انجح ولا اودع الالم الا بدونكم
فارحلوا او انتظروا لكن بعيدين عن طريق حياتي
فهو ملكي
انا وحدي

(العنوسة هي الحل -1 ) استنيه يا اختي



استنيه يا اختي

زي ما وعدتكم بدات حملة لمكافحة الحب و الارتباط بكافة اشكاله للشباب و البنات
وده لما يمثله من خطورة على صحتهم النفسية و العضوية و العاطفية
و النهاردة حوجه كلامي للبنات و اعرفهم اول مشكلة من مشاكل الحب وسنينه
بصي يا حلوة الاول صلي بينا على النبي (عليه افضل الصلاة والسلام) احب اقولك مبدئيا كده الرجالة انواع
في منهم الكويس ومنهم المنيل بستين نيلة ولو ان الكويس اصلا ندرة ميتعدش بس برضه مش مشكلة نقول انه في كويس لاحسن يقولوا عليا معقدة ولا حاجة (حاشا لله)
النهاردة بقى انا مش حجيب سيرة المنيلين لا دانا حتكلم عن الكويسين الطيبين المحترمين اللي بيبقوا داخلين على جد مش لعب و اشتغلات واللي يحبك بجد يعني ويدخل البيت من بابه زي مخليق ربنا
مش اللي يضحك عليكي و يقولك نتعرف على بعض لمدة سنتين الاول و بعد كده نقرر اذا كنا حنكمل ولا لا او هو يجي يقولك بعد السنتين ما يخلصوا انا اكتشفت ان كيميتي مش راكبة مع كيميتك الله يركبوك الحمار بالمشقلب يا بعيد و يجيلك مغص في كيميتك اللي قرفانة معاك دي.
المهم نرجع للمحترمين
المحترمين دول يا ستي بيبقوا ناس عملية و متربية اوي و ميقولوش الكلمة الا بحساب و يفكروا الف مرة قبل ما يقولوها
و ده في حد ذاته شئ كويس (بس مش كويس اوي يعني ) بس المشكلة بقى لما يبقى بيفكر كتير.... كتير اوي... كتير اوي اوي .... كتير اوي اوي اوي يعني 
يعني مثلا هو يقول ايه هو مش حيفتح بوقه و يكلمك الا لما يتاكد من مشاعره ناحيتك(طب كويس علشان نحل مشاكل الكيميا والاحياء بتاعته) بس ممكن يحاول يجس نبض علشان هو كمان ميتعلقش بيكي على الفاضي 
وطبعا الست عندها جواها رادار كده بيشاورلها على الراجل المعجب بيها وعمر الرادار ده ما خيب ابدا فهو اول ما حيجس نبض حتعرفي على طول هو حاسس بايه وطبعا لانه محترم زي ما قولتلك ودي عملة نادرة و كمان معجب بيكي وبيحبك زي ما انتي حاسة و شبه متاكدة و غالبا بتبقى انتي كمان ميالاله و معجبة بيه 
كل ده كويس جدا وفي مصلحتكم انتم الاتنين واحد محترم بيحب بنت كويسة وهي بتبادله نفس الشعور طب ايه المشكلة بقى؟
المشكلة انه غالبا برضه حيبقى بيفكر كتييييييييييييييييييييييييييييييير اوي زي ما قولتلك و حيفضل يجس نبض كتييييييييييييييييييير برضه و خالي بالك هو الرادار بتاعه مش زي بتاعك لا ده سرعة الاستقبال عنده تكاد تكون تحت الصفر بمراحل و في منه النوع اللي ميعرفش انك فعلا بتحبيه الا لو وقفتي قصاده و قولتيله بحبك يا بني ادم  يا #%#% يا %#@%#$ يا @%#$^ ياللي مش بتفهم 
هو بيتخيل برضه ان كل اللي بيعمله جس نبض و بيستغرب هو انتي ليه من ساعة ما بدا يلمحلك وكل اسبوع يشيلوكي على المستشفى علشان جاتلك اذمة قلبية و ممكن مرة يجي في باله انه ممكن يكون تصرفاته و طولة باله وجس النبض هو السبب لكن الفكرة دي مش بتستنى كتير و بتروح الحمد لله و يقول في باله لا ده تلاقيه مرض وراثي ربنا يشفيها
المهم يعني البيه حيقعد يلمحلك و يختبر احساسه بتاع سنتين تلاتة لحد ما يتاكد انكم مناسبين لبعض!!! ويقعد يفكر يفاتحك ازاي سنتين تلاتة زيهم !! و يقعد يفكر كمان بتاع 10 سنين يا ترى امكنياته حتكفي انه يشيل مسؤولية كبيرة زي الجواز ولا لا
و يفكر اذا كان اهله واهلك حيوافقوا وازاي ممكن يقنعهم بتاع 5 سنين كمان
وحضرتك كل ده قاعدة مستنية
بس احب ابشرك باذن الله هو محترم كفاية انه يتجوزك فعلا بعد ما استنتيه العمر ده كله ولو ان سن احفادك حيكون انسب كتير للجواز في الوقت ده بس برضه حيتقدملك ساعتها و ممكن تلحقوا تتجوزا و تتدخلوا دنيا كام يوم كده قبل ما تخرجوا منها
والله لو لسة مستعدة تدخلي الدوامة دي و تستنيه كل ده انا مش حمنعك انتي حرة 
بس ممكن توفري على نفسك كل ده و تجيجي معايا تسعديني في رفع راية الاضراب عن الجواز

كلمة اخيرة:
للرجالة اللي من النوعية اللي فوق ... ارحمونا بقى دا انتم لو بتفكروا تفتحوا عكا مش حتطلعوا عنينا كده
ده مش جس نبض ده
ده انتم حتوقفوا قلبنا بالمنظر ده