السبت، 9 فبراير، 2013

(العنوسة هي الحل -1 ) استنيه يا اختي



استنيه يا اختي

زي ما وعدتكم بدات حملة لمكافحة الحب و الارتباط بكافة اشكاله للشباب و البنات
وده لما يمثله من خطورة على صحتهم النفسية و العضوية و العاطفية
و النهاردة حوجه كلامي للبنات و اعرفهم اول مشكلة من مشاكل الحب وسنينه
بصي يا حلوة الاول صلي بينا على النبي (عليه افضل الصلاة والسلام) احب اقولك مبدئيا كده الرجالة انواع
في منهم الكويس ومنهم المنيل بستين نيلة ولو ان الكويس اصلا ندرة ميتعدش بس برضه مش مشكلة نقول انه في كويس لاحسن يقولوا عليا معقدة ولا حاجة (حاشا لله)
النهاردة بقى انا مش حجيب سيرة المنيلين لا دانا حتكلم عن الكويسين الطيبين المحترمين اللي بيبقوا داخلين على جد مش لعب و اشتغلات واللي يحبك بجد يعني ويدخل البيت من بابه زي مخليق ربنا
مش اللي يضحك عليكي و يقولك نتعرف على بعض لمدة سنتين الاول و بعد كده نقرر اذا كنا حنكمل ولا لا او هو يجي يقولك بعد السنتين ما يخلصوا انا اكتشفت ان كيميتي مش راكبة مع كيميتك الله يركبوك الحمار بالمشقلب يا بعيد و يجيلك مغص في كيميتك اللي قرفانة معاك دي.
المهم نرجع للمحترمين
المحترمين دول يا ستي بيبقوا ناس عملية و متربية اوي و ميقولوش الكلمة الا بحساب و يفكروا الف مرة قبل ما يقولوها
و ده في حد ذاته شئ كويس (بس مش كويس اوي يعني ) بس المشكلة بقى لما يبقى بيفكر كتير.... كتير اوي... كتير اوي اوي .... كتير اوي اوي اوي يعني 
يعني مثلا هو يقول ايه هو مش حيفتح بوقه و يكلمك الا لما يتاكد من مشاعره ناحيتك(طب كويس علشان نحل مشاكل الكيميا والاحياء بتاعته) بس ممكن يحاول يجس نبض علشان هو كمان ميتعلقش بيكي على الفاضي 
وطبعا الست عندها جواها رادار كده بيشاورلها على الراجل المعجب بيها وعمر الرادار ده ما خيب ابدا فهو اول ما حيجس نبض حتعرفي على طول هو حاسس بايه وطبعا لانه محترم زي ما قولتلك ودي عملة نادرة و كمان معجب بيكي وبيحبك زي ما انتي حاسة و شبه متاكدة و غالبا بتبقى انتي كمان ميالاله و معجبة بيه 
كل ده كويس جدا وفي مصلحتكم انتم الاتنين واحد محترم بيحب بنت كويسة وهي بتبادله نفس الشعور طب ايه المشكلة بقى؟
المشكلة انه غالبا برضه حيبقى بيفكر كتييييييييييييييييييييييييييييييير اوي زي ما قولتلك و حيفضل يجس نبض كتييييييييييييييييييير برضه و خالي بالك هو الرادار بتاعه مش زي بتاعك لا ده سرعة الاستقبال عنده تكاد تكون تحت الصفر بمراحل و في منه النوع اللي ميعرفش انك فعلا بتحبيه الا لو وقفتي قصاده و قولتيله بحبك يا بني ادم  يا #%#% يا %#@%#$ يا @%#$^ ياللي مش بتفهم 
هو بيتخيل برضه ان كل اللي بيعمله جس نبض و بيستغرب هو انتي ليه من ساعة ما بدا يلمحلك وكل اسبوع يشيلوكي على المستشفى علشان جاتلك اذمة قلبية و ممكن مرة يجي في باله انه ممكن يكون تصرفاته و طولة باله وجس النبض هو السبب لكن الفكرة دي مش بتستنى كتير و بتروح الحمد لله و يقول في باله لا ده تلاقيه مرض وراثي ربنا يشفيها
المهم يعني البيه حيقعد يلمحلك و يختبر احساسه بتاع سنتين تلاتة لحد ما يتاكد انكم مناسبين لبعض!!! ويقعد يفكر يفاتحك ازاي سنتين تلاتة زيهم !! و يقعد يفكر كمان بتاع 10 سنين يا ترى امكنياته حتكفي انه يشيل مسؤولية كبيرة زي الجواز ولا لا
و يفكر اذا كان اهله واهلك حيوافقوا وازاي ممكن يقنعهم بتاع 5 سنين كمان
وحضرتك كل ده قاعدة مستنية
بس احب ابشرك باذن الله هو محترم كفاية انه يتجوزك فعلا بعد ما استنتيه العمر ده كله ولو ان سن احفادك حيكون انسب كتير للجواز في الوقت ده بس برضه حيتقدملك ساعتها و ممكن تلحقوا تتجوزا و تتدخلوا دنيا كام يوم كده قبل ما تخرجوا منها
والله لو لسة مستعدة تدخلي الدوامة دي و تستنيه كل ده انا مش حمنعك انتي حرة 
بس ممكن توفري على نفسك كل ده و تجيجي معايا تسعديني في رفع راية الاضراب عن الجواز

كلمة اخيرة:
للرجالة اللي من النوعية اللي فوق ... ارحمونا بقى دا انتم لو بتفكروا تفتحوا عكا مش حتطلعوا عنينا كده
ده مش جس نبض ده
ده انتم حتوقفوا قلبنا بالمنظر ده

هناك 4 تعليقات:

  1. richard the brave heart9 فبراير، 2013 2:38 ص

    دمها خفيف

    ردحذف
  2. ههههههههههههههههههههه جميلة جداً يا منة. تسلم إيدكِ.

    ردحذف
  3. انتي اصلا عفريته وبتموتيني من الضحك

    بس اقولك ايه هييييييح مبناخدش من الرجاله

    غير شد شعرنا تصدقي شكلعا هترسى على

    اتباع نظرية البعد عنهم غنيمه

    #سيبك انتي والنبي يا اوختشي مالينا الا بعضينا

    وانا شخصيا ك منه زيك وكده يعني اتبسط :)

    ردحذف
  4. يعني الواحد يتعامل معاكم بتانى تزعلو
    بتشرع تزعلو
    نعملكو ايه مانتو اللى ما بيعجبكوش العجب .. نقلب قرود يعني :D

    عامه انا ماعرفش رجاله من النوعيه اللى بتقولي عليها دى .. معرفش انتى قابلتيهم في انهى دحضيرة :D

    ردحذف