السبت، 23 فبراير، 2013

طب اراهنكم




سهل الكلام جدا بس الفعل مفيش
طب اراهنكم تقعدوا سنين تقولوا قلبنا مقفول و مش حنحب
ومع اول نظرة لشخص معين تلاقي قلبك مش مكانه
تحس كانك كنت ماشي في حالك و حد نشلك و يا ريته خد قلبك و سابك في حالك
ده عامل زي اللي في ايده مغناطيس بيشد بيه قلبك نحيته و يفضل يا عيني القلب يتنطط وهو محبوس جوة صدرك لا هو عارف ينط يروح يقوله على اللي جواه ولا هو عارف يفضل في مكانه ساكت و هادي زي ما كان
حتحس انت كمان ان الدنيا ضيقة اوي مش سايعاك تعيش فيها انت واحساسك بيه و في نفس الوقت حتحسها واسعة جدا و كبيرة اوي لما تحسب المسافات اللي بينك و بينه حتى وهو قصاد عينك

اراهنكم لو قولتم حتى لو قابلنا الحب حنلف و نمشي من الناحية التانية
بس اول ما تسمع صوت حد معين تلاقيه بيحتل روحك و يتغلغل جواك كانه بيجري ويا دمك وبيكتفك ويخليك تمشي وراه زي المسحور
و يا ريته بيديك فرصة صوتك انت تطلع تقوله على اللي عمله فيك لا ده بيفضل ساحرك بكلامه اللي مش بيكفيك ولا بيروي قلبك العطشان ليه و بيكتف لسانك اللي مبيقدرش ينطق بحرف واحد من اللي نفسك تقولهوله
ساعتها حتتنفس حبه اللي حيبقى اوكسجينك بعد ما تكتشف ان الهوا اللي كنت بتتنفسه مفيهوش اوكسجين حقيقي وانك حتبدا تتخطف من الدنيا اللي مكنتش عايش فيها اصلا علشان تعرف يعني  ايه حياة بجد
اراهنكم ان الحب اقوى منكم كلكم وامكر منكم كلكم وان كان للكره مدخل في عقلك فكل مداخل قلبك و مشاعرك و ووجدانك وروحك مفتوحة على اخرها للحب و بس, ومهما حاولت تقفل فيها وتوهم نفسك انك تقدر تطرده من حياتك مش حتقدر
للاسف هو الاقوى و الابقى لانه الاصل في حياتك
للاسف لو زارك في يوم بجد عمرك ما حتقدر تهرب
والحاجة الوحيدة اللي ممكن تعملها في الوقت ده انك تصلي لربك وتدعيله يكون اللي ملك مفتيح حياتك في اللحظة دي يقدر يحس باللي جواك 
لان الحب اللي من النوع ده لو ملكك بجد و محدش حس بيك حيستفرد بيك احساسك
ومش بعيد يخلص عليك
لكن لو ربنا رزقك باللي يحس بيك بجد ويقدر حبك ده 
حتبقى الجنة على الارض

هناك تعليقان (2):

  1. فعلا الجنة على الأرض كلامك مليوووووووون صح
    الحب اللى بجد وحقيقى هو اللى بيملك كيانك ووجدانك وكل حاجة جواكى مش بتشوفى غير حبيبك وبس اللى هو اصل الحياة واللى قدملك السعادة على طبق من دهب اللى هو طاقة النور اللى اتفتحتلك بعد ما كانت حياتك كلها ضلمة

    يارب يا منة تحسى الاحساس ده بجد لانك تستاهلى كل حاجة حلوة
    وربنا يرزقك بالحب الحقيقى والشخص الحقيقى اللى يحس اللى جواكى ويستاهله
    ربنا يسعدك يارب
    واراهنك انك يوم ما تقابلى الحب ده مش هتقدرى تقولى لا
    بحبك فى الله يا أغلى صديقة:))))

    ردحذف
  2. ده حقيقي
    يارب يدق قلبك للشخص الصح يارب

    ردحذف