الثلاثاء، 5 فبراير، 2013

العنوسة هي الحل



الحب و سنينه 
والجواز و مشاكله
و معظم الاذمات النفسية والاجتماعية اللي بنتحط فيها بسبب المشاكل العاطفية 
فكرت في الحل لكل ده و ملقيتش الا ان الشباب و البنات يقتنعوا ان اتخاذ العزوبية و العنوسة (مع الاعتراض على المصطلح الاخير ده و اعتباره نوع من الاهانة لكنه اللفظ الدارج استخدامه و ممكن نستعيض عنه مثلا بالعزوف عن الجواز) هم دول الحل علشان نريح دماغنا شوية من البلاوي اللي بتتحدف علينا
مثلا لو الولد قرر انه يفضل سينجل كده 
عمره ما حيصدم بنت ولا يضحك على بنت ولا يضطر يكدب على بنت و برضه مفيش احتمال انه يقابل بالغلط واحدة هي اللي تشتغله و تضحك عليه ولا حيضطر يقرف نفسه في يوم ما بالبحث عن عروسة و شقة و مهر وشبكة و عفش فيعيش رايق و مبسوط و يلعب بلايستيشن مع اصحابه زي ما يحب
و كمان البنات لو قررت تقاطع صنف الولاد ده خالص محدش حيوجعلها قلبها و يسهرها الليل و يسمعها قصايد شعر و بعد كده يروح يخطب صاحبتها مثلا
ولا يتجوز بنت عمه اللي كان ناسي انه خاطبها اصلا 
كمان ربنا حيرحمها من العاهات المتنكرة في شكل عرسان اليومين دول (اسالوني انا )
و لو هي اقتنعت بفكرة العزوف عن الجواز بجد مش حيبقى عندها الهاجس بتاعة صاحبتي اتجوزت وانا لسة 
لا دي ممكن كمان تفضل تتريق عليها يوم فراحها وتروح تقولها منجلكيش في حاجة وحشة ويجعله اخر الاحزان(لو صاحبتك مش مقتنعة بكلامي و قاطعتك بعد الفرح متجيش تشتميني لو سمحت)
كمان اوعد كل البنات والولاد اللي حينضموا للحملة و يقتنعوا بالفكرة دي انهم حيبقوا مليونيرات في خلال فترة قصيرة
ازاي؟ ماهو انتم لو وفرتم تمن التليفونات اللي بتبقى طول الليل والهداية في اعياد الميلاد والفلانتين و اللي من غير مناسبة و الفسح و المصاريف دي كلها مش حتلاقوا حاجة تصرفوا فيها فلوسكم
و حتقدروا تحوشوا كل الفلوس دي و مش بعيد التفكير العملي يلعب معاكم والفراغ يخليكم تفتحوا مشاريع تشغلوا فيها فلوسكم دي و تتنغنغوا بقى و تدعوا لاختكم
وعلى راي اللي قال
للعزوبية سبع فوايد  و العنوسة هي الحل 
وعموما اللي مش مصدقني بتابع معايا خلال الفترة الجاية كلامي عن الارتباط و مشاكله و الحل السحري لكل المشاكل دي و يدعيلي(او يدعي عليا انا و ظروفي بقى)

هناك 10 تعليقات:

  1. :D :D كلام دمه خفيف فكرتني بحملة المجد للسناجل. اسلوب ساخر لذيذ بس ركزي شوية في الغلطات الاملائية . وضحكتيني . تسلم ايدك

    ردحذف
  2. الاخطاء الاملائية دي ملهاش حل :(
    انا لما باجب انشر حاجة في كتاب المصحح اللغوي بتاع الكتاب بيشتغلي مخصوص تقريبا
    و بفكر اعين واحد للمدونة بالمرة :D
    ميرسي على رايك واتمنى تعجبك باقي المقالات اللي جاية ^_^

    ردحذف
  3. ههههههههههههه هو ده الحل فعلاً، عجبتني التدوينة دمك خفيف و فعلاً الجواز مشاكله كتيرة مش بسببنا، بسبب المجتمع اللي خلقله مشاكل من ولا حاجة.
    تسلم ايدك :)

    ردحذف
    الردود
    1. تسلمي يا جميل
      مبسوطة انها عجبتك :)

      حذف
  4. جميل اوى البوست
    اسلوبك ساخر ودايما بيعجبنى :)

    ردحذف
    الردود
    1. انا مبسوطة ان اللي بكتبه بيعجبك والله ^_^
      شرفني و جودك وتعليقك يا اية بجد :)

      حذف
  5. بس في الاخر الجواز هوا املنا الكبير في الحياه :)

    ردحذف
    الردود
    1. يا عم متتجوز حد ماسكك P:
      و لا اقولك خاليك في الحزب بتاعك احسن D=

      حذف
  6. هههه
    أدخلتِ البسمة بهذه الكلمات .. وبانتظار الآتي إن شاء الله إن قدر لي المتابعة ..
    دمت بألف خير ..

    ردحذف
    الردود
    1. ان شاء الله تعجبك ديما :)

      حذف