الخميس، 14 فبراير، 2013

مذكرات فراولة VS يوميات كاتبة فاشلة جدا (4)


الحلقة الرابعة

فالنتين بطعم النكد

14-2-2013



صحيت الصبحية كالعادة غيرت هدومي ولبست الجاكيت الاسود الطويل على البنطلون الجينز الازرق والبلوزة البيضة و البوت الاسود الطويل ولفت الطرحة كالعادة ونزلت روحت الشغل 
بس لفت انتباهي حاجة غريبة
انا كنت الحاجة السودة الوحيدة اللي ماشية في الشارع 
اه والله ما بهزر انا كنت حاسة اني نقطة سودة في بحر احمر 
قعدت اتلفت حوليا وكالعادة بتسال هو في ايه؟ هو النهاردة ماتش الاهلي ولا ايه؟ بس و انا رايحة الشغل في طريقي مريت على محل انا متاكدة ان صاحبه زمالكاوي لاقيت برضه خير اللهم اجعله خير المحل لونه اتغير وبقى احمر في احمر قولت يمكن الراجل اتلخبط وكان يقصد يلونه بمبي زي لون اليونيفورم الجديد بتاع الزمالك (لهذا حديث اخر في وقت اخر) بس مظنش ده احمر احمر مش بمبي خالص
و كمان ده راسم على باب المحل قلوب!!!
قلوب؟
افتكرت حاجة وطلعت الموبيل بتاعي علشان اتاكد منها واللي حسبته لاقيته
النهاردة يوم 14 فبراير وانا ناسية خالص 
الفالنتين داي (في رواية اخرى عيد الحب)
يا سلااااااااااااااااااااااااام النهاردة العيد اللطيف الظريف ده اللي انا عمري ما اتنيلت على عيني و احتفلت بيه خالص
اد ايه الواحد كان نفسه يتخطب او يتجوز بس علشان يعدي عليه الفلانتين وهو معاه شريك ينسى يقولي كل سنة وانتي طيبة في اليوم ده و لا ميجيبش دية وتكون النتيجة اني انكد عليه و اطلع عينه عقابا ليه على عدم تذكر هذا الحدث المهم (مع انه لو جابلي حاجة حزعل لان فرصة النكد راحت عليا- طيبة طيبة يعني)
المهم بقى روحت الشغل وانا في دماغي تلك الافكار الجميلة الحالمة وانا بقول امتى يجي اليوم ده بقى
ومن حظي ال................ ما علينا قابلتلكم الانسة (م) اللي حتكون سبب في موتي باكسفكسيا الغيظ ولاقيتها كاتبة حاجة جديدة عن الفلانتين وامري لله اضطريت انشرها علشان بس انا لازم التزم بالوعد بتاعي واسفة اني مضطرة اعمل فيكم كده و اخليكم تقروا هي كاتبة ايه
سامحني يا رب :(



اشعار في الحب و كده

14-2-2013



بصوا انا كنت قررت ابطل اكتب شعر
والله كنت ملتزمة بالقرار ده بس مقدرتش امنع الالهام بقى
و اوعدكم المرة دي احسن من المرة اللي فاتت
وكمان مش حاجة كبيرة دي صغننة و حلوة
اه والنيعمة
اسمعوا كده و قولولي رايكم

دبدوبي

حبوبي حبوبي 
جابلي دبدوبي
لونه احمر وردي
و حلفني و مسك يدي
ابقى اسميه دوبي
حبوبي حبوبي
اداني دوبي
ملفوف بشرايط
بس قماشه شايط
من لمسة بيدوبي
محبوبي محبوبي
رجعتله دبدوبي
جايبلي هدية بالية
واجيبله الحاجة غالية
وانفضله جيوبي


ها ايه رايكم يا جماعة؟ حلوة؟

هناك تعليق واحد:

  1. مش هقولك غير حاجة واحدة بس يا منة
    حسبي الله ونعم الوكيل ههههههههههههههههه
    كل اللي انتي قولتيه كوم والـ ( الشعر ) الأخير ده كوم
    ربنا يسامحك يا شيخة
    ده كلام تقابلي بيه ربنا برضه ؟

    هههههههه
    سلام

    ردحذف