اهداء



لكل كتاب قريته و كتب جوايا كلمة
لكل فكرة عجبتني و حسيتها بتتكلم عني
للافكار اللي كتبت فيها كتير و لسة الكلام مخلصش
للافكار اللي جت و مشيت من غير ما اعرف اكتب فيها حرف
لماما الي عرفت اني بكتب شعر و مقالات و قصص بعد 13 سنة من اول حاجة كتبتها لانها لو كانت عرفت ساعتها كان ممكن تقتلني :))
لبابا الله يرحمه اللي مات و هو عارف ان كل مواهبي اني يدوب برسم حلو زيه :((
لجدتي الله يرحمها اللي علمتني اننا ممكن نحب كل الناس حتى لو جرحونا عادي جدا و ميبقاش اسمه ضعف
لاخواتي اللي بيغلسوا عليا علشان بس يعرفوني انهم لسة بيحبوني
لاصحابي اللي خانوني و باعوني قبل اللي حبوني بجد و سندوني
لكل اللي بيزعلوا مني لانهم مش بيستوعبوا حالات الصمت اللي بدخل فيها ساعات
لكل اللي قرالي كلمة وقالي يا مجنونة فاتاكدت انها عجبته
للفراولة و وسط البلد و الهزار و الضحك و الدموع و كل حاجة حبيتها في الدنيا دي
للموت اللي فرق بيني و بين ناس كتير بحبهم و حرمني اتعلم حاجات كتير متعلمتهاش
لموت المشاعر في قلوب ناس اللي وجع قلبي انا
لصلاح جاهين و عم جلال و انيس منصور و عم نجم اللي كل الناس ما عدا انا بتقول ان لسانه طويل و لقصيدته الحلوة اللي شبهي - بلح ابريم- و لصوت منير و هو بيغنيها
و لكل كلمة حلوة اتقالت او متقالتش
بهديكم السلام
و كل الكلام =))